अनलाईनबाट १९ लाख बढी ठगी गरेको आरोपमा पक्राउ

काठमाडौँ- अनलाईनबाट ठगी गरेको आरोपमा काठमाडौँबाट एक जना पक्राउ परेका छन् ।  काठमाडौं नेपालटार बस्‍ने रुकुम रन्मामैमकोट गाउँपालिका-३ का २३ वर्षीय विकास गुरुङलाई ठगी गरेको १९ लाख ६० हजार रुपैयाँ सहित प्रहरीले पक्राउ गरेको हो । 

विकासले वाटस्एप प्रयोगकर्ताहरूको मोबाइलमा सम्पर्क गरी चिठ्ठा परेको, विदेशबाट सामान पार्सल आएको भन्दै उक्त सामान लिन र चिठ्ठामा दाबी भुक्तानी लिन कर तिर्नुपर्ने भनी झुट्टा बहाना बनाई कर बापतको रकम विभिन्न व्यक्तिको बैंक खातामा जम्मा गर्न लगाई ठगी गरेको प्रहरीले जनाएको छ । 

महानगरीय अपराध महाशाखा मिनभवनबाट खटिएको प्रहरीले उनलाई काठमाडौं गैरीधाराबाट उक्त रकमसहित पक्राउ गरेको हो । उनलाई थप अनुसन्धानका लागि महानगरीय प्रहरी परिसर काठमाडौं पठाईएको  महाशाखाले जनाएको छ ।