पल शाहको कार्यक्रममा पत्रकारलाई निषेध !

काठमाडौँ - समीक्षा अधिकारीसँगको अफेयरको खबर सार्वजनिक भएसँगै पत्रकारसँग चिढिँदै आएका पल शाहले पत्रकार सम्मेलनमा नै पत्रकारलाई अवरोध गर्न थालेका छन् । शनिबार सार्वजनिक हुने एउटा गीतको कार्यक्रममा पलको इशारामा आयोजकले पत्रकारलाई छिर्नै दिएनन् । 

शनिबार पल शाह अभिनीत ‘तिमीलाई हेरेर’ बोलको गीतको भिडियो सोल्टीमोडस्थित न्यु हायात होटलमा सार्वजनिक गर्ने कार्यक्रम थियो । कार्यक्रमको बारेमा थाहा पाएर समाचार संकलनका लागि गएका पत्रकार त्यतिबेला छक्क परे जतिबेला गार्डले उनीहरूलाई छिर्न दिएन ।

र्यक्रममा जान नपाएका पत्रकारका अनुसार होटलका  सुरक्षाकर्मीले कार्ड हुनेले मात्र छिर्न पाउने भन्दै विना कार्ड त्यहाँ पुगेका पत्रकारलाई फर्काइदिएका थिए । नेपाली फिल्म वा म्युजिक भिडियोको कुनै पनि कार्यक्रममा पत्रकारलाई कार्ड मागेर नहुँदा फर्काइएको यो पहिलो घटना थियो । 

‘आजसम्म कहिलै यस्तो भएको थिएन । हामीलाई कार्ड चाहिन्छ भन्ने पनि थाहा थिएन । तर आज बेइज्जत भएर फर्कनु पर्यो,’ पल शाहको कार्यक्रममा छिर्न नपाएकी एक पत्रकारले इकागजसँगको कुराकानीमा भनिन् । 

समीक्षासँगको अफेयरको खबर सार्वजनिक भएसँगै म्युजिक भिडियो सार्वजनिकीकरणका कार्यक्रमबाट भाग्दै आएका पल लामो समयपछि मिडिया सामु आउन तयार भएका थिए । यसअघि उनी आउने भनेर ५ घन्टासम्म कुर्ने गरेका पत्रकार खाली हात फर्कँदै आएका थिए ।