सुर्खेतका ९९ वडामा अधिवेशन सुरु

सुर्खेत - सुर्खेतमा काँग्रेसको वडा अधिवेशन आजदेखि सुरु भएको छ । नेपाली काँग्रेसको १४औँ महाधिवेशनअन्तर्गत आजदेखि वडा अधिवेशन सुरु भएको काँग्रेस सुर्खेतका सभापति कमलराज रेग्मीले जानकारी दिए ।

रेग्मीकाअनुसार अधिवेशनका लागि सबै वडामा निर्वाचन अधिकृत खटाइसकिएको छ । रेग्मीले जिल्लाका ९९ वटै वडामा तयारी पुरा भइसकेको जनाए ।  जिल्लामा झण्डै ११ हजार ५ सय बढी क्रियाशील सदस्य छन् ।

यसअघि सुर्खेतमा अखण्ड नेपाल पार्टीबाट समायोजन भई आएकालाई क्रियाशील सदस्यता दिने विषयमा विवाद थियो । पार्टी केन्द्रले अखण्ड नेपालबाट आएका एक सय ९९ लाई सदस्यता दिने परिपत्र पठाएपछि विवाद उत्पन्न भएको थियो ।

सदस्यताका विषयमा विवाद समाधान भएपछि अधिवेशनको काम अघि बढाएको सभापति रग्मीको भनाइ छ । अधिकांस वडाहरूमा सहमतिको प्रयास गरिएको भएता पनि वीरेन्द्रनगरका केही वडाहरुमा चुनाव गर्नुपर्ने अवस्था सिर्जना हुने देखिएको काँग्रेस नेताहरूको भनाइ छ ।