अक्षयकुमार र रोहित सेठ्ठीमाथि पैसाको वर्षा, ‘सूर्यवंशी’का लागि नेटफ्लिक्सले तिर्यो सय करोड

मुम्बई- ‘सूर्यवंशी’ले बक्स अफिसमा पैसा छापिरहेको छ । गत शुक्रबार रिलिज भएको फिल्मले बुधबारसम्ममा १ अर्ब १२ करोड कमाइ गरेको छ र बलिउडका व्यापार विश्लेषकले ५० प्रतिशत अकुपेन्सीको नियमका बावजुद फिल्मले गरेको यो कमाइलाई ऐतिहासिक भन्दै प्रशंसा गरिरहेका छन् । 

आइतबारपछिका विक डेजमा पनि थामिने नाम नलिएको फिल्मले नेटफ्लिक्ससँग आकर्षक सम्झौता गरेको समाचार आएका छन् । बलिउड हंगामाले स्रोतलाई उद्धृत गर्दै लेखेको समाचारअनुसार नेटफ्लिक्सले यो फिल्म सय करोडमा किनेको छ ।

फिल्म डिसेम्बर ४ मा नेटफ्लिक्समा सार्वजनिक हुने पनि समाचारमा उल्लेख छ । हलमा अघिल्लो हप्ता सार्वजनिक हुनुअघि यो फिल्मलाई नेटफ्लिक्सले १ अर्ब ५० करोड दिएको चर्चा थियो । तर निर्देशक रोहित सेठ्ठी र अक्षयकुमारले हलमा रिलिज गर्ने अडान नछाडेपछि सम्झौता टुंगोमा पुग्न सकेको थिएन । तर हलमा रिलिज भएको चार हप्तापछि नेटफ्लिक्समा आउने गरी दुवैबीच सम्झौता भएको हो । 

अक्षयकुमार, कट्रिना कैफ र ज्याकी श्राफको मुख्य भूमिका रहेको फिल्ममा अजय देवगन र रनवीर सिंह अतिथि भूमिकामा देखिएका छन् । सय करोड क्लबमा प्रवेश गरेसँगै अक्षयकुमार र रोहित सेठ्ठी दुवैले बक्स अफिसमा नयाँ रेकर्ड कायम गरेका छन् ।

सय करोड कमाउने रोहित सेठ्ठी निर्देशित यो नवौँ फिल्म हो भने  अक्षयकुमारको पन्ध्रौँ । हिरोमा अक्षयकुमार र निर्देशकमा रोहित सेठ्ठी सय करोड क्लबमा कीर्तिमान राख्न सफल हस्ती हुन् । १ सय २० फिल्म गरेका अक्षयकुमारको यो फिल्मलाई उनको करिअरको ५५ औँ हिट फिल्म मानिएको छ ।