एमालेले डिजिटल माध्यमबाट महाधिवेशन प्रचार प्रसार गर्ने

काठमाडौँ – नेकपा एमालेले पार्टीको १० औं महाधिवेशनमा पोस्टर, पम्पलेटको प्रयोग नगर्ने भएको छ । बुधबार ललितपुर च्यासलस्थित तुलसीलाल स्मृति प्रतिष्ठानको भवनमा बसेको महाधिवेशन मूल व्यवस्थापन समितिको बैठकले महाधिवेशनको प्रचार प्रसार डिजिटल माध्यमबाट गर्ने निर्णय गरेको हो ।

महाधिवेशनको उद्घाटन मंसिर १० गते मध्यान्ह १२ बजे चितवनको नारायणी नदी किनारमा अध्यक्ष केपी ओलीले गर्ने र बन्द सत्र सौराहामा हुने कार्यसूची छ । उद्घाटन सत्रमा चितवन र आसपासका जिल्लाबाट ५ लाख जनपरिचालन गर्ने योजना रहेको एमाले सचिव एवम् प्रचार विभाग प्रमुख योगेश भट्टराईले जानकारी दिए । यसअघि कात्तिक २७ गते प्रतिनिधिको निर्वाचन गरेर १९ सय ९९ प्रतिनिधि छनौट गर्ने र ३० गतेभित्र प्रतिनिधिको नाम केन्द्रीय कार्यालयमा उपलव्ध गराउने उनले बताए ।

महाविधेशनअन्तर्गत १० गते हुने उद्घाटन सत्रपछि ११ गते नै निर्वाचन प्रक्रिया सुरु हुने तथा १२ गते निर्वाचनका लागि मतपरिणाम आउने सचिव भट्टराईले जानकारी दिए । बैठकले महाविधेशनका लागि प्रत्येक सदस्यबाट कम्तीमा एक सय रूपैयाँ संकलन गर्ने निर्णय गरेको भट्टराईले बताए ।

हाल पार्टीमा ७ लाख ३० हजार सदस्य रहेको र महाधिवेशनको खर्चका लागि खोलिएको खातामा सात करोडभन्दा बढी जम्मा हुने आकलन गरिएको छ । बैठकमा महाधिवेशन उपसमितिहरूले पेश गरेका  कार्ययोजनासहितको प्रतिवेदन पारित गरेको भट्टराईले जानकारी दिए ।