बुटवलमा सात लाख रूपैयाँ बराबरको पटाका नष्ट

बुटवल – रुपन्देहीका विभिन्न स्थानबाट प्रहरीले बरामद गरेको सात लाख रूपैयाँ बराबरको पटाका मंगलबार नष्ट गरेको छ । जिल्ला प्रहरी कार्यालय रुपन्देहीले तिहारको समयमा विभिन्न स्थानबाट नियन्त्रणमा लिएको ६ लाख ८१ हजार ५ सय ७५ रूपैयाँ बराबरको पटाका नष्ट गरेको हो ।

कात्तिक १७ र १८ गते विभिन्न स्थानमा फेला पारेको अवैध पटाका बरामद गरी मंगलबार जिल्ला प्रहरी कार्यालय परिसरमा नष्ट गरिएको रुपन्देही प्रहरीका प्रवक्ता प्रहरी नायव उपरीक्षक सत्यनारायण थापाले बताए । प्रहरीले स्थानीयबासी तथा पत्रकारको रोहबरमा पटका नष्ट गरेको हो । रुपन्देही प्रहरीले बुटवल उपमहानगरपालिका–४ अमरपथ, वडा नम्बर ८ सुख्खानगर, लुम्बिनी सांस्कृतिक नगरपालिका–१३ कालिदह, सिद्धार्थनगर–२ झण्डीबजार, वडा नम्बर १२ कालिकापथ, वडा नम्बर ३ खजहना, सम्मरीमाई गाउँपालिका–३ गुलरिया र मर्चवारी गाउँपालिका–२ अमुवा बजारबाट अवैध पटाका बरामद गरेको थियो ।