चिसोसँगै प्रदुषण बढेपछि शतर्क रहन महाशाखाको आग्रह

काठमाडौँ – मौसम पूर्वानुमान महाशाखाले चिसो बढ्दै गएकोले शतर्क रहन आग्रह गरेको छ । जाडो मौसम सुरु भएसँगै चिसो बढ्दै गएकोले यसबाट बच्न शतर्क रहनुपर्ने मौसम पूर्वानुमान महाशाखाका वरिष्ठ मौसमविद् वरुण पौडेलले बताएका हुन् ।

उनले गत १० दिनको तापक्रम हेर्दा काठमाडौं उपत्यकासहित देशभर चिसो बढ्दै गएको स्पष्ट पारे । पौडेलका अनुसार सो दिनमा काठमाडौंको तापक्रम १७ डिग्रीबाट ८ डिग्री सेल्सियससम्म झरेको छ । उनले कात्तिक महिनामा नै जुम्लाको तापक्रम माइनस वान डिग्री सेल्सियससम्म पुगेको जानकारी दिए । आगामी दिनमा काठमाडौं उपत्यकाको तापक्रम घटेर माइनस वा जिरो डिग्री सेल्सियससम्म पुग्ने अनुमान महाशाखाले गरेको छ ।

मौसमविद् पौडेलले भारत र चीनमा पनि प्रदूषण बढी रहेकोले नेपालमा जाडो याममा मुख्य सहरहरूमा प्रदूषण बढ्न सक्ने जनाए । उनले लामो समयसम्म खडेरी भएमा प्रदूषण वायु मण्डलनजिकै बस्ने र हावा नचल्ने भएकोले काठमाडौंलगायत वीरगञ्ज, धनगढी, नेपालगञ्ज, र जनकपुर जस्ता सहरहरूमा आगामी दिनमा प्रदूषण बढ्ने बताए ।

जाडो याममा बढी नै प्रदूषण हुने भन्दै घरबाट ननिस्किन, मर्निङ वाकमा नजान र बालबालिका, वृद्धवृद्धालाई चिसोबाट बचाउने उपायहरू अपनाउन उनले सर्वसाधारणमा आग्रह गरे ।