किमाथाङ्का नाकालाई व्यवस्थित गर्ने अर्थमन्त्रीको प्रतिवद्धता

खाँदवारी– अर्थमन्त्री जनार्दन शर्माले सङ्खुवासभाको किमाथाङ्का नाका व्यवस्थित गरेर सञ्चालन गर्ने बताएका छन् । प्रेस सेन्टर संखुवासभाले खाँदबारीमा आयोजना गरेको पत्रकार सम्मेलनमा उहाँले अरुण करिडोरको निर्माणसँगै चीनसँगको नाका किमाथाङ्कालाई व्यवस्थित गरिने बताएको हो । अरुण करिडोरको निर्माणले संखुवासभामा विकासको ढोका खुल्ने उनले बताए । 

संखुवासभामा अथाह प्राकृतिक स्रोत साधन रहेको भन्दै मन्त्री शर्माले त्यसको उपयोगबाट जिल्लालाई धनी बनाउन मद्दत पुग्ने उल्लेख गरे । अर्को एउटा कार्यक्रममा मन्त्री शर्माले अरुण नदीबाट उत्पादित विद्युतले नेपालको अर्थतन्त्र मजबुद बनाउने बताए । 

‘अरुणबाट उत्पादित विद्युतले नेपालको व्यापार घाटा कम गर्न मद्दत पुग्ने उत्पादन वृद्धि गरी राष्ट्रिय अर्थतन्त्रलाई स्थायित्व र दीगो विस्तारको मार्ग सिर्जना गर्नेछ,’ उनले भने । 

व्यापार घाटा कम गर्न सक्ने स्रोत–साधन संखुवासभामा रहेका कारण सरकारले लगानी बढाउने अर्थमन्त्री शर्माले प्रतिबद्धता जनाए । अरुणमा जलविद्युत् आयोजना निर्माण गर्न सरकारी कम्पनीलाई जिम्मा दिएर काम अघि बढाउन पहल गरिरहेको उनको भनाइ थियो ।