दाहालका पछि लागेको सम्झिँदा लाज लाग्छ : प्रभु साह

चितवन – नेकपा एमालेका केन्द्रीय सदस्य प्रभु साहले नेकपा माओवादी केन्द्रका अध्यक्ष पुष्पकमल दाहालका पछि लागेको सम्झिँदा लाज लाग्ने बताएका छन् ।  मंगलबार चितवनमा आयोजित एमालेको कार्यक्रममा बोल्दै साहले यस्तो बताएका हुन् । 

दाहालले चुनावमा आफूलाई कम्युनिस्ट बताएर जनताबाट भोट लिए पनि त्यसअनुसार काम नगरेको साहले आरोप लगाए । ‘युद्धका बेला हामीले दाहाललाई साथ दियौं । तर उनका पछि लागेको अहिले सम्झिँदा लाज हुन्छ । चुनाव लड्दा कम्युनिष्टका लागि भन्दै भोट माग्नुभयो, त्यसमा पाँच वर्ष पनि टिक्नु भएन,’ साहले भने, ‘अहिलेका दाहाल पहिलेको जस्तो लाग्दैन । हामी किन यस्ताका पछि लागेछौं । अहिले सम्झिँदा लाज लाग्छ ।’

अघिल्लो निर्वाचनमा दाहालले ‘भरतपुर काण्ड’ मचाएको साहले आरोप लगाए । सो काण्ड चितवनका लागि धब्बा भएको उनले बताए । ‘भरतपुरमा लागेको त्यो धब्बा मेटाउन अब जरुरी छ । अहिले पनि असली माओवादी एमालेमै छ,’ साहले भने ।

एमालेले १० औं महाधिवेशन चितवनमा आयोजना गर्ने भएको छ । सोमबार नै अध्यक्ष केपी ओलीसहितका नेता चितवनका विभिन्न स्थानमा पार्टी केन्द्रित कार्यक्रममा व्यस्त छन् । चितवन भ्रमणका क्रममा ओली एमालेको महाधिवेशन आयोजनास्थल नारायणी नदी किनार, सौराहा, माडीमा रहेको राम मन्दिरलगायत स्थानमा आयोजित कार्यक्रममा सहभागी भएका छन् । काठमाडौँबाट चितवन गएको एमाले टोली मंगलबार फर्कदै छ ।