सुदूरपश्चिममा बेमौसमी वर्षाका कारण ५ अर्ब बढीको नोक्सान

कैलाली- कार्तिक पहिलो साता परेको बेमौसमी वर्षाका कारण धानखेतीमा सुदूरपश्चिममा मात्रै ५ अर्ब बढीको नोक्सान भएको छ । 

काटेर भित्र्याउन तयार भएको धान बाढीले बगाएपछि किसानलाई ठूलो घाटा लागेको छ। अविरल वर्षा हुनुभन्दा अगाडि भित्र्याइएको र बर्षापछि सुकाएको धान बिक्रीका लागि अहिले कैलाली र कञ्चनपुरका किसानहरु ब्यापारीकोमा धाइ रहेका छन्। तर सरकारले तोकेको मूल्यमा भने उनीहरुले बिक्री गर्न पाएका छैनन् । सरकारको बेवास्ताका कारण किसानहरु सस्तोमा धान बिक्री गर्न बाध्य छन्।

सरकारले तोकेको मूल्य भन्दा झन्डै आधा मूल्यमा व्यापारीहरुले धान खरिद गर्न थालेको किसानहरु बताउँछन । धनगढी उपमहानगरपालिका-७ पटेलाका किसान धन बहादुर चौधरीले सरकारले धान खरिदका लागि अहिलेसम्म स्थान नतोकेका कारण सस्तोमा धान बिक्री गर्न बाध्य भएको बताए । 

सरकारले निर्धारण मूल्य तोक्ने तर खरिद नगर्ने समस्याका कारण किसानहरु जहिलै पीडित बन्दै आएको बेलौरी नगरपालिका-७ कंचनपुरका रामदिन रानाले बताए ।  उनले व्यापारीहरुले अहिले निकै सस्तोमा धान खरिद गरिरहेको बताउँदै अघिल्लो बर्ष २२ सय रुपैया क्विन्टलमा बेचेको धान यो बर्ष १२ सय देखि १३ सय सम्ममा बिक्री गर्न बाध्य भएको बताए । 

यस वर्ष सरकारले मोटो धानको न्यूनतम मूल्य प्रतिक्विन्टल दुई हजार ७५२ रुपैयाँ र मध्यम धान दुई हजार ८८५ रुपैयाँ तोकेको छ। तर सरकारी निकायले धान खरिदका लागि अहिलेसम्म स्थान समेत तोकेको छैन । खाद्य व्यापार कम्पनी लिमिटेड प्रादेशिक कार्यालय धनगढीकी निमित्त प्रमुख कल्पना विष्टले अहिलेसम्म केन्द्रबाट धान खरिदका लागि कुनैपनि निर्देशन नआएको बताइन्। उनले केन्द्रबाट निर्देशन नआएका कारण धान खरिदमा समस्या आएको बताइन ।