१५ मिनेटमै फूल चार्ज हुने साओमीको नयाँ फोन

काठमाडौँ - चिनियाँ कम्पनी साओमीले १५ मिनेटमा फुल चार्ज हुने नयाँ फोन सार्वजनिक गरेको छ । साओमीले रेड्मी नोटको नयाँ सिरिज नोट-११ बजारमा ल्याएको हो । कम्पनीले पहिलो पटक चिनियाँ बजारमा रेड्मी नोट ११, रेड्मी नोट ११ प्रो र रेड्मी नोट ११ प्लस गरी तीन मोडलमा नयाँ स्मार्टफोन सार्वजनिक गरेको छ ।

विशेषताहरू

रेड्मी नोट ११ मा  मिडिया टेक डाइमेन्सिटी ८१० फाइभजी ओक्टा कोर चिपसेट प्रोसेसर छ । एन्ड्रोइड ११ अपरेटिङ सिस्टममा आधारित मियूआई १२.५ संस्करणमा चल्ने नोट ११ सिरिजमा पछाडि भागमा चार ओटा क्यामेराको सेटअप छ ।

रेड्मी नोट ११ मा ६४ मेगापिक्सेलको प्राइमरी सेन्सर, आठ मेगापिक्सेलको अल्ट्रा वाइड एंगल सेन्सर, समान दुई मेगा पिक्सेलका अन्य लेन्स छन् । फोनको अगाडि भागमा सेल्फी तथा भिडिओ खिच्नका लागि १६ मेगापिक्सेलको फ्रन्ट क्यामेरा रहेको छ ।

प्रो तथा प्रो प्लस भेरियन्टमा डाइमेन्सिटी ९२० चिपसेट राखिएको छ भने मेमोरीको रुपमा दुवैमा ६ जीबी र्‍याम तथा १२८ जीबी मेमोरी , ८ जीबी र्‍याम १२८ जीबी मेमोरी र ८ जीबी र्‍याम २५६ जीबी मेमोरी गरी तीन ओटा विकल्प छन् ।

१०८ मेगापिक्सेलको मेन क्यामेरा राखिएका यी दुवै मोडेलमा दुवैमा ८ मेगापिक्सेलको अल्ट्रा वाइड क्यामेराको साथमा २ मेगापिक्सेलको टेलिम्याक्रो लेन्स राखिएको छ । साथमा जेबीएलको साउन्ड प्रयोग गरिएको छ ।

१५ मिनेटमा फुल चार्ज

रेड्मी  नोट  ११ मा ५ हजार एमएएच क्षमताको ब्याट्री राखिएको छ । जसले यूएसबी  टाइप सी  पोर्टमार्फत ३३ वाट फास्ट चार्जिङलाई सपोर्ट गर्दछ । यसलाई कम्पनीले भने ६२ मिनेटमा फूल चार्ज हुने दाबी गरेको छ ।

रेड्मी नोट ११ प्रो प्लसको सबैभन्दा आकर्षक फिचर भनेको यसमा १२० वाट फास्ट चार्जिङ रहेको छ । जसले यसमा राखिएको ४५०० एमएएच क्षमताको ब्याट्रीलाई करिब १५ मिनेटमै फुल चार्ज गर्न सक्ने कम्पनीले जनाएको छ ।