प्रधानमन्त्री ओलीले गरे निर्वाचन आयोगका पदाधिकारीसँग छलफल

काठमाडौं : प्रधानमन्त्री केपी शर्मा ओलीले निर्वाचन आयोगका पदाधिकारीहरूसँग छलफल गरेका छन् । प्रतिनिधिसभा विघटन गरेर नयाँ निर्वाचनको मिति घोषणा भएको सन्दर्भमा प्रधानमन्त्री ओलीले आइतबार साँझ आयोगका पदाधिकारीसँग छलफल गरेका हुन् ।

आयोगका तर्फबाट प्रमुख निर्वाचन आयुक्त दिनेशकुमार थपलियासहित अन्य आयुक्तसँग मध्यावधिक निर्वाचनबारे छलफल भएको प्रधानमन्त्री ओलीका प्रेस सल्लाहकार सूर्य थापाले जानकारी दिए । थापाकाअनुसार प्रधानमन्त्री निवास बालुवाटारमा भएको छलफलमा संसदीय दलका उपनेता सुवास नेम्वाङ, गृहमन्त्री रामबहादुर थापा, नेकपा महासचिव तथा अर्थमन्त्री विष्णु पौडेल सहभागी थिए ।

आइतबार मन्त्रिपरिषद्को सिफारिसमा राष्ट्रपति विद्यादेवी भण्डारीले प्रतिनिधि सभा विघटन गरेकी छन् । प्रतिनिधि सभा विघटनसँगै आगामी बैशाख १७ र २७ गते दुई चरणमा निर्वाचनकाे मिति तय गरिएको छ ।