अर्जुनधारा नगर कमिटी अध्यक्षमा बलदेव गोम्देन विजयी

बिर्तामोड - नेकपा एमाले झापाको अर्जुनधारा नगर कमिटी अध्यक्षमा बलदेव गोम्देन विजयी भएका छन् । अर्जुनधारामा २ सय २९ मतदाता संख्या रहेकोमा गोम्देनले १ सय १७ मत ल्याएका छन् । उनका प्रतिद्वन्द्वी लोकनाथ गौतमले १ सय २ मत पाएका छन् । 

गोम्देन अर्जुनधारा नगरपालिकाका १० नम्बर वडाध्यक्ष हुन् भने गौतम ६ नम्बर वडाध्यक्ष हुन् । नगर कमिटी उपाध्यक्षमा खगेन्द्र इङ्नामलाई पराजित गर्दै लोकमान श्रेष्ठ विजयी भएका छन् । इङ्नामले ७८ मत ल्याउँदा श्रेष्ठले १ सय ४१ मत पाएका छन् । उनको मत निर्वाचनकै सर्वाधिक हो । यस्तै सचिमा लभकुश गौतम विजयी भएका छन् भने उपसचिवमा सरिता भण्डारी विजयी भएकी छन् । उपसचिव प्रत्यासी कमलादेवी भण्डारीलाई ३० मतअन्तरले पराजित गर्दै सरिता विजयी भएकी हुन् ।

२ सय २६ मत खसेको अर्जुनधारामा ७ मत बदर भएको निर्वाचन समितिले जनाएको छ । मंगलबार उद्घाटन भएको प्रथम नगर अधिवेशनमा बुधबार मनोनयन दर्ता गरिएको थियो ।