एमालेको महाधिवेशनमा १५ सय ३६ प्रतिनिधि सहभागी हुने

काठमाडौँ – नेकपा एमालेको १० औं महाधिवेशन प्रतिनिधि १ हजार ५ सय ३६ जना हुने भएका छन् । बिहीबार ललितपुर च्यासलस्थित तुलसीलाल स्मृति प्रतिष्ठान भवनमा बसेको स्थायी कमिटी बैठकका निर्णय सुनाउँदै प्रवक्ता प्रदीप ज्ञवालीले यस्तो जानकारी दिए ।

प्रवक्ता ज्ञवालीले भुगोलबाट १ हजार १ सय ९६ जना प्रतिनिधि हुने बताए । उनले हरेक निर्वाचन क्षेत्रबाट ३ जना महिला आउने र त्यो ३३ प्रतिशत हुने जानकारी दिए । यस्तै ४९ प्रतिशत खुला प्रतिनिधि हुने र ५१ प्रतिशत समावेशी प्रतिनिधि हुने ज्ञवालीले बताए ।

बिहीबारको स्थायी कमिटी बैठकको निर्णयलाई भोलि (शुक्रबार) बस्ने केन्द्रीय कमिटी बैठकले अनुमोदन गर्ने उनले जानकारी दिए । एमालेकाे १० औं महाधिवेशन मंसिरमा चितवनमा आयाेजना हुँदै छ ।