भीम रावलको राजीनामा स्वीकृत

फाइल तस्‍बिर

काठमाडौँ – नेकपा एमाले १० बुँदे सहमति कार्यदलका संयोजक डा. भीम रावलको राजीनामा स्वीकृत भएको छ । पार्टीमा १० बुँदे कार्यान्वयन गर्न अध्यक्ष केपी शर्मा ओलीले चासो नदेखाएको भन्दै असन्तुष्टि जनाउँदै अघिल्लो स्थायी कमिटी बैठकमा रावलले राजीनामा घोषणा गरेका थिए । अध्यक्ष ओलीलाई लिखित राजीनामा पनि दिएका थिए । उक्त राजीनामा आजको स्थायी कमिटीले स्वीकृत गरेको हो ।

‘कार्यदल संयोजकबाट भीम रावलले राजीनामा बुझाउनुभएको छ । अब कार्यदलका अरु सदस्यले काम अगाडि बढाउनु हुनेछ,’ प्रवक्ता प्रदीप ज्ञवालीले भने ।ज्ञवालीले कार्यदलका अन्य सदस्यबाट समस्या समाधान हुन नसकेमा स्थायी कमिटीले टेकओभर गर्ने पनि जानकारी दिए ।  ‘आवश्यक पर्‍यो भने स्थायी कमिटीले आवश्यक निर्णय गर्छ । कामलाई अगाडि बढाउँछ,’ उनले भने ।

तत्कालीन अवस्थामा अध्यक्ष ओली र वरिष्ठ नेता माधव नेपालबीच विवाद मिलाउन दुवैतर्फका पाँच, पाँच जना नेता सम्मिलित कार्यदलले २७ असार राति १० बजे १० बुँदे सहमति जारी गरेको थियो । त्यतिबेला नेपाल पक्षमा रहेका रावलसहित १० नेता सोही १० बुँदेलाई आधार मानेर भदौदेखि एमालेमा आएका छन् ।

तर ओलीले आफूहरूलाई एमालेमा अल्झाउनका लागि मात्रै १० बुँदेको सहारा लिएको भन्दै रावलले पार्टीभित्र असन्तुष्टि जनाउँदै आएका थिए । खासगरी रावलकै असन्तुष्टि सम्बोधनका लागि एक महिनाअघि ओलीले रावलको संयोजकत्वमा १० बुँदे कार्यान्वयन कार्यदल गठन गरेका थिए । कार्यदल गठन गरे पनि आफूले भनेअनुसार नभएको भन्दै रावलले अघिल्लो स्थायी कमिटीको बैठकमा कार्यदल संयोजकबाट राजीनामाको घोषणा गरेका थिए । रावलकाे साेही राजीनामा  बिहीबार बसेकाे स्थायी कमिटिकाे बैठकले स्वीकृत गरेकाे हाे ।