नेकपाबाट छुट्टिएर बनेका पार्टी अझै फुट्न सक्छन् : दाहाल

चितवन – नेकपा माओवादी केन्द्रका अध्यक्ष पुष्पकमल दाहालले तत्कालीन नेपाल कम्युनिष्ट पार्टी (नेकपा)बाट छुट्टिएर बनेका दल अझै टुक्रिनसक्ने बताएका छन् ।  बिहीबार चितवनको माडीमा आयोजित कार्यक्रमलाई सम्बोधन गर्दै दाहालले यस्तो खतरा औंल्याएका हुन् । 

‘अघिल्लो निर्वाचनमा मेरै पहलमा वामगठबन्धन गरेर साझा घोषणा पत्र र उम्मेदवारसहित निर्वाचनमा गई पछि नेकपा बनाएका थियौं । दुई अध्यक्षबीच प्रधानमन्त्री र अध्यक्षमा सहमति भएको थियो,’ दाहालले भने, ‘तर, दुर्भाग्य भनौं, पार्टी बडो प्राविधिक र अप्राकृतिक तरिकाले दुर्र्ईटा भयो । अहिले तीन वटा भएको छ । अझै चारवटा हुनसक्ने खतरा छ । यसलाई बिडम्बना नै मान्नुपर्छ ।’ 

तर, दाहालले नेकपा एमाले, माओवादी केन्द्र वा नेकपा एकीकृत समाजवादी कुन पार्टी विभाजन हुन लागेको हो यसबारे स्पष्ट पारेनन् । आगामी निर्वाचनमा आफूले चितवनबाटै उम्मेद्वारी दिने र विजयी बन्ने उनले बताएका छन् ।