पोल भाडा सम्झौता गर्न दुरसञ्‍चार प्राधिकरणको निर्देशन

काठमाडौँ- नेपाल दुरसञ्‍चार प्राधिकरणले कार्तिक महिनाभित्र पोल भाडा सम्झौता गरी सक्न इन्टरनेट सेवा प्रदायकहरूलाई निर्देशन दिएको छ ।

दुरसञ्‍चार प्राधिकरणले बिहिबार एक सुचना जारी गर्दै पोल भाडा सम्झौता कार्तिक महिनाभर गरिसक्न भनेको छ । सेवाप्रदायकहरूले विद्युत पोलहरू प्रयोग गरेको स्थान, परिणाम र अवधि स्वयम्‌ घोषणा गर्नुपर्नेछ । केही समयअघि पोल प्रयोगबापत भाडा सम्झौता नगरेको भन्दै नेपाल विद्युत प्राधिकरणले इन्टरनेट तार काट्न सुरु गरेको थियो । तर चर्को दबाब पछि बसेको सरोकारवाला निकायहरूको बैठकले विद्युत प्राधिकरण तत्काल तार नकाट्न घोषणा गरेको थियो । सम्झौता नगरेका सेवाप्रदायकलाई कात्तिक मसान्तभित्र सम्झौतामा आउने समयसीमा दिइएको थियो ।

साथै पोल भाडा महँगो भएको विषयमा सञ्‍चार तथा सूचना प्रविधि मन्त्रालयका सहसचिव विनोद सिंहको संयोजकत्वमा अध्ययन समितिसमेत गठन भएको थियो । समितिलाई पोल भाडा विवाद समाधानका लागि मंसिर १५ गतेसम्म प्रतिवेदन बुझाउने म्याद दिइएको छ ।