हात्तीको आक्रमणबाट ज्यान गुमाएको कार्की परिवारले पायो किरिया खर्च

कञ्चनपुर – शुक्लाफाँटा नगरपालिकाले हात्तीको आक्रमणबाट ज्यान गुमाएका परिवारलाई ५० हजार किरिया खर्च उपलब्ध गराएको छ । नगरपालिकाको वडा नम्बर १२ मा हात्तीको आक्रमणबाट ज्यान गुमाएका ध्वजबहादुर कार्की र मथुरा कार्कीका परिवारलाई नगर प्रमुख दिलबहादुर ऐर र नगर उपप्रमुख तुलसीदेवी हमालले मंगलबार घरमै पुगेर किरिया खर्च हस्तान्तरण गरेका हुन् । 

बुधबार हात्तीले घरआँगनमै आक्रमण गरी कार्की दम्पतीको ज्यान लिएको थियो । शुक्रबार नगर विपद् समितिको बैठकले पीडित परिवारलाई किरिया खर्च उपलब्ध गराउने निर्णय गरेको थियो । यस्तै नगरपाकिाले वडा नम्बर १ स्थित स्याली नदीमा बगेर मृत्यु भएका कृष्णदत्त भट्टको परिवारलाई २५ हजार रूपैयाँ किरिया खर्च उपलब्ध गराएको छ ।