एमाले छोडेकाहरू फर्किन थालेका छन् : प्रदीप ज्ञवाली

गुल्मी – नेकपा एमाले स्थायी कमिटी सदस्य प्रदीप ज्ञवालीले पार्टी विभाजनले एमालेलाई कुनै असर नगरेको जिकिर गरेका छन् । गुल्मीको रेसुंगा नगरकमिटीको प्रथम अधिवेशनलाई मंगलबार सम्बोधन गर्दै उनले अधिकांश कार्यकर्ता तथा जनप्रतिनिधिले विभाजन नचाहेको बताए ।

पार्टीका केन्द्रीय कमिटीबाट २३ प्रतिशत र स्थानीय तहबाट सात प्रतिशत मात्रै माधव नेपाल नेतृत्वको नेकपा एकीकृत समाजवादीमा गएको बताउँदै ज्ञवालीले गुल्मीमा कोही पनि जननिर्वाचित प्रतिनिधिले एमाले नछोड्नु खुसीको कुरा भएको उल्लेख गरे । एमाले छोडेकाहरू पनि फर्किने क्रम सुरु भएको ज्ञवालीको भनाइ छ । ‘एमाले छोडेर गएकाहरू पुनः हाम्रै पार्टीमा फर्किन थालेका छन् । एमालेको विभाजन कसैले पनि चाहेको छैन,’ उनले भने ।