बैतडीमा सेनाले खानेपानी वितरण गर्दै

फाइल तस्‍बिर

बैतडी – वर्षाका कारण आएको बाढीले पाइप बगाउँदा बैतडी सदरमुकाममा खानेपानी अभाव भएको छ । यसैसाता परेको अविरल वर्षााले खानेपानीको संरचनामा क्षति पुर्‍याएपछि खानेपानीको समस्या देखिएको हो । सदरमुकाम क्षेत्रमा खानेपानीको हाहाकार भएपछि नेपाली सेनाले वितरण गर्न थालेको छ । हनुमानध्वज गुल्मले सदरमुकामका सरकारी कार्यालय, सुरक्षा निकाय, सर्वासाधारणलाई खानेपानी विरण गरिरहेको छ ।

जर्गबाट ल्याइएको छट्टै रिजर्व ट्यांकीबाट पानी वितरण गर्न थालिएको हनुमानध्वज गुल्मका गुल्मपति, सेनानी खिलबहादुर रानाले जानकारी दिए । ‘गुल्मभित्र जर्गबाट ल्याइएको सानो रिजर्व ट्यांकी थियो, सोही ट्यांकीबाट पाइप लगाएर वितरण गर्दैछौं, सरकारी कार्यालयमा पाइपबाट पानी तानेर लगिएको छ, अन्य सर्वासाधारणका लागि मूलगेटअगाडि धारा जडान गरेका छौं,’ उनले भने ।

सेनाले खानेपानी वितरण गर्दा थोरै भए पनि  सदरमुकाम क्षेत्रमा राहत भएको स्थानीको भनाइ छ । दशरथचन्द  नगरपालिका-४ को गढी, गोठालापानी र शाहिलेक क्षेत्रमा खानेपानीको समस्या भएको त्यहाँका बासिन्दाको गुनासो छ । सदरमुकामबाट झण्डै छ किलोमिटर टाढा रहेको माडखोलाको मुहानमा पहिरो जानाका साथै पाइपमा वर्षाले क्षति पुर्‍याएकाले खानेपानीको  समस्या भएको स्थानीयबासी प्रकाश चन्दले बताए । खानेपानीको समस्या भएको हप्ता दिन भइसक्दासमेत कुनै सुनुवाइ भएको छैन ।