वासिङ्टनमा मार्च ३१ सम्म स्वास्थ्य संकटकाल

अमेरिकाको वासिङ्टन डिसीमा स्वास्थ्य स‌ंकटकालको समयावधि लम्व्याइएको छ । स्वास्थ्य संकटकाल आगामी मार्च ३१ सम्मका लागि कायमै राख्‍ने निर्णय भएको मेयरको कार्यालयले जनाएको छ । “आज मेयर मुरिएल बोसेरले एउटा आदेश जारी गर्दै कतिपय गतिविधिमा प्रतिवन्ध लगाउनु भएको छ,” कार्यालयका एक अधिकारीले भने ।

स्वास्थ्य संकटकाल लगाइएको बारेमा सरकारी अधिकारीले शुक्रबार बेलुका जानकारी दिएका हुन् । विषेश गरेर क्रिसमस र नयाँ बर्ष मनाउनका लागि धेरै भीडभाड तथा चहलपहल हुने र त्यही क्रममा कोभिड-१९ को सङ्क्रमण थप फैलिने खतरा देखिएकाले संकटकाल लम्ब्याइएको उनीहरुको भनाइ छ ।

विश्‍व स्वास्थ्य संगठनले गत बर्षको मार्च ११ तारिखमा कोभिडको असरलाई महामारी घोषणा गरेको थियो । कोभिडका कारण विश्‍वभरी अहिलेसम्म सात करोड ५६ लाखभन्दा बढी मानिस सङ्क्रमित भएका छन् भने १६ लाख ७० हजारभन्दा बढीको मृत्यु भएको छ ।

ती मध्ये सबैभन्दा धेरै अमेरिकामा मात्रै तीन लाख १३ हजारभन्दा बढीको मृत्यु भएको र एक करोड ७४ लाखभन्दा बढी सङ्क्रमित भएको अधिकारीले जनाएका छन् । (रासस)