जारी प्रथामा नरेन र सुरक्षाको ‘बुलाकी’

काठमाडौँ - अर्काकी श्रीमतीलाई भगाएपछि तिनुपर्ने क्षतिपूर्ति अर्थात जारी प्रथामा आधारित रहेर अर्को फिल्म बन्ने भएको छ । उपेन्द्र सुब्बाले यही प्रचलनमा आधारित रहेर ‘जारी’ शीर्षककै फिल्म बनाएका छन् जुन निर्माण भएर प्रदर्शनको पर्खाइमा छ ।

यही प्रथामा आधारित रहेर लक्ष्मण सुनारले पनि फिल्म बनाउने भएका छन् । ‘बुलाकी’शीर्षकमा बन्न लागेको यो फिल्ममा नरेन खड्का र सुरक्षा पन्त मुख्य भूमिकामा रहनेछन् । 

डोल्पाका विभिन्न रमणीय लोकेशनमा छायांकन गरिने यो फिल्ममा नरेन र सुरक्षासँगै विराज विष्ट, प्रेमदेव गिरी, सुशील पोखरेल, लक्ष्मी गिरी, कुलदीप अधिकारी, अप्सना थापा, सरस्वती खत्री, प्रकाश कँडेल, सन्ध्या पौडेल आदि कलाकारको अभिनय रहनेछ । 

स्थानीय बोलीचालीको भाषामा निर्माण गर्न लागिएको फिल्मको केही दृश्य मेक्सिकोमा समेत छायांकन गरिने बताइएको छ । राजबहादुर सानेको कथा, राजबहादुर, निर्मल पौडेल र निर्देशक सुनारकै पटकथा रहेको फिल्मलाई शिव ढकालले खिच्ने छन् । मोती बिष्ट तथा गोपाल बिष्टद्वारा निर्माण गरिने उक्त फिलमको छायांकन दसैँ लगत्तै प्रारम्भ हुने बताइएको छ ।