व्यवसायी रमेश महर्जनको कोभिड संक्रमणबाट निधन

काठमाडौँ– रत्‍न तथा आभूषण महासंघका अध्यक्ष व्यवसायी रमेश महर्जनको कोभिड–१९ संक्रमणबाट निधन भएको छ । आरबी डायमन्ड ज्वेलर्सका प्रबन्ध निर्देशक समेत रहेका महर्जन समाजसेवामा समेत सक्रिय थिए ।

महर्जन यसअघि साझा पार्टीको समर्थनमा ललितपुर महानगरपालिकाको मेयरका उम्मेद्वार बनेका थिए । उनको अगुवाईमा पाटनको पिलाछेंमा भूकम्पपछिको पुनर्निर्माण भएको थियो । 

शरीरमा असहज महसूस भएपछि उनले असोज २६ मा स्वास्थ परीक्षण गराउँदा कोभिड–१९ पोजिटीभ देखिएको थियो । उनको परिवारमा श्रीमतीसहित सबैलाई कोभिड–१९ संक्रमण पाइएको थियो ।  आफू र श्रीमतीसहित परिवारका सदस्यलाई कोभिड–१९ संक्रमण देखिएको भन्दै उनले लगत्तै अघिदेखि सम्पर्कमा रहेकाहरूलाई सतर्कता अपनाउन आग्रह गर्दै फेसबुकमा स्ट्याटस समेत राखेका थिए । 

महर्जनको शारीरिक अस्वस्थताकै कारण उनलाई ललितपुरको मेडिसिटी अस्पतालमा भर्ना गरिएको थियो । उपचारका क्रममा आज बिहान ११ बजेतिर उनको निधन भएको महर्जनका पुराना मित्र सुरेन्द्रवीर मालाकारले इकागजलाई बताए । ५६ वर्षीय महर्जनकी श्रीमती तथा  एक छोरा र दुई छोरी छन् ।