श्रीराम राईको ‘पोलेको मकै’ बजारमा

काठमाडौँ - साहित्यकार श्रीराम राईद्वारा लिखित बालकथा संग्रह ‘पोलेको मकै’ पुस्तक बजारमा आएको छ । विशेषतः बाल साहित्यमा कलम चलाउने राईको बालकथा संग्रहमा बालमनोविज्ञानलाई विशेष प्राथमिकता दिएर लेखिएका पहाडी भेगका रमाइला र घतलाग्दा कथा समावेश छन् । लेखक राईले विद्यालय तहका सबै विद्यार्थीका लागि कथा संग्रह उपयोगी हुने बताए । उनकाअनुसार  ‘पोलेको मकै’मा शिक्षामूलक अनि रमाइला बालकथा छन् । 

गंगा कर्माचार्य पौडेलले सम्पादन गरेको कथा संग्रहमा मुनाको अभियान, बलजितको जुक्ति, सुम्निमाको भ्रमण, पोलेको मकै, फूल फुलून् चरी उडून्, पारुको पढाइ र बुबाको एसएमएसलगायत ७ कथा छन् ।

साहित्यकार राईले यसअघि टोली नेता (बालकथा संग्रह–२०७४), आजका लघुकथा (संयुक्त लघुकथा संग्रह–२०७४) आदि कृति प्रकाशन गराइसकेका छन् । खोटाङको दिक्तेल रूपाकोट मझुवागढी नगरपालिका–७ सिर्जनाकुञ्ज घर भएका लेखक राई हाल काठमाडौंमा साहित्यिक पत्रकारिता गरिरहेका छन् । बुक्स हिमालयले प्रकाशन गरेको ‘पोलेको मकै’का कथाहरूका चित्र राजकुमार प्रजापतिले कोरेका हुन् । बालकथा संग्रहको मूल्य ९९ रुपैयाँ छ।