कोभिडविरुद्धको फाईजर खोप दशैँलगत्तै

फाइल तस्बिर

काठमाडौँ- फाईजरको कोभिडविरुद्ध लगाइने एक लाख फाईजर खोप तिहार अगाडि ल्याइने भएको छ । दशै पछाडि तथा तिहारअघि फाईजरको खोप ल्याइने भएकाले परिवार कल्याण महाशाखाले खोप भण्डारण शाखालाई निर्देशन दिएको छ ।

खोप आयात भएमा खोप भण्डार गर्न  तयारी अवस्था रहेको सेवा विभाग अन्तर्गत खोप भण्डारण शाखाका प्रमुख बडेबाबु थापाले जानकारी दिए । 'परिवार कल्याण महाशाखाबाट तिहार अघि खोप नेपाल ल्याइने जानकारी प्राप्‍त भएको छ,' थापाले भने,' खोप भण्डार गर्नका लागि आवश्यक संरचना पनि तयार भइसकेको छ । 'थापाले नेपाललाई १ लाख ६ सय खोप प्राप्‍त हुने इकागजलाई जानकारी दिए ।

उक्त खोप अल्ट्रा लो टेम्प्रेचरमा राख्‍न मिल्ने गरी प्राविधिक रुपम व्यवस्थापन गरिएको छ । उक्त फ्रिजमा माईनस ७०-८० डिग्रीको तापक्रमसम्म व्यवस्थापन गर्न सकिने गरी तयारी गरिरहेको थापाले बताए । फाईजर खोप राख्‍न सय लिटरको चार वटा फ्रिज ल्याइएको छ । उक्त फ्रिज युनिसेफले उपलब्ध गराएको हो ।

डेढ करोड बढी खोप भित्रियो

भारतबाट अनुदानस्वरुप प्राप्‍त १० लाख कोभिसिल्ड खोप नेपाल भित्रिएसँगै गत वर्षको माघ १४ गतेदेखि नेपालमा कोभिडविरुद्धको खोप लगाउन थालिएको थियो । अहिलेसम्म पहिलो र दोस्रो डोज खोप लगाउनेको संख्या करिब डेढ करोड पुगिसकेको छ । हालसम्म एक करोड ६१  लाख ४२ हजार कोभिडविरुद्धको खोप भित्रिएको छ ।

चीनबाट अनुदानस्वरुप १८ लाख र खरिद गरी ८४ लाख भेरोसेल खोप ल्याइएको छ । भारतबाट कोभिसिल्ड खोप ११ लाख अनुदानस्वरुप, खरिद गरी १० लाख र कोभ्याक्स मार्फत ३ लाख ४८ खोप ल्याइएको थियो । भुटानबाट २ लाख ३० हजार, अमेरिकाबाट जोनसन एण्ड जोनसन १५ लाख ३४ हजार, बेलायतबाट १ लाख ३० हजार र जापानबाट १६ लाख खोप अनुदान स्वरुप ल्याइएको हो ।

औषधि व्यवस्था विभागले भारतको सिरम इन्स्टीच्यूटबाट उत्पादित कोभिसिल्ड, चीनबाट सिनोफार्मको भेरोसेल, भारतबायोटेकको कोभ्याक्सिन, फाइजरको कोभ्यान्टिक र  रसियन कम्पनी 'स्पुटनीक भि'ले आपतकालीन प्रयोगका अनुमति दिएको छ ।