पोखराको पर्यटन उकास्‍न ‘सडक महोत्सव’

पोखरा : गत चैतबाट पोखराको पर्यटन थलिएको छ । कोरोनाले थलिएको पर्यटन अझै उठ्न सकेको छैन । पोखरेली पर्यटन व्यवसायीले पोखराको पर्यटनलाई गतिशिल बनाउन २२ औं संस्करणको पोखरा सडक महोत्सव सञ्चालन गर्ने भएका छन् । आयोजक रेस्टुरेन्ट एन्ड बार एसोसिएसन (रेबान) पोखराले बुधबार पत्रकार सम्मेलन गरी स्वास्थ्य मापदण्ड अपनाएर सडक महोत्सव गरिने जनाएको छ । २२ औं संस्करणको महोत्सव पुस १५ देखि १७ गतेसम्म सञ्चालन गरिने भएको छ । विगतमा ५ दिन हुने गरेको महोत्सव यस वर्ष ३ दिनमात्रै चल्ने भएको हो ।

पोखरा खुल्लै छ र सुरक्षित छ भन्ने सन्देश दिन महोत्सव सञ्चालन गरिने सडक महोत्सव आयोजना समिति संयोजक वसन्त गौतमले जानकारी दिए । ‘पोखरा खुल्लै छ र पर्यटकलाई स्वागत गर्न पोखरा तयार छ भन्ने सन्देश दिन महोत्सव आयोजना गरिएको हो,’ संयोजक गौतमले बताए । २२ औं संस्करण विगतका वर्षजस्तो भव्य तरिकाले हुने छैन । यस संस्करणमा कोमागाने पार्कभित्र कन्सर्ट हुने छैन । रेवान पोखरा अध्यक्ष लक्ष्मण बरालले यस वर्षको महोत्सव सहिदचोकदेखि खहरेसम्मको ३ किलोमिटर सडकमा हुने जनाए ।

महोत्सवको पहिलो र तेस्रो दिन दिउँसो ३ देखि राति १० बजेसम्म महोत्सव क्षेत्रमा सवारी प्रवेश निषेध गरिएको छ । दोस्रो दिन इभमा भने मध्य रात १२ बजेसम्म कार्यक्रम हुनेछ । विगतमा पोखरा पर्यटन परिषद अध्यक्ष गोपी भट्टराईले कोरोनाले प्रभावित पर्यटन क्षेत्रलाई सडक महोत्सवले चलायमान बनाउने विश्वास व्यक्त गरे । सरकारले व्यवसायीका लागि ल्याएको जीवन रक्षा कोष कार्यान्वयनमा ल्याउनुपर्ने उनको माग छ । महोत्सवमा सांस्कृतिक कार्यक्रमबाहेक केही खेलकुद गतिविधि पनि हुने छन् । डुंगा दौड प्रतियोगिता, तारो (आर्चरी) हान्ने प्रतियोगिता र बिच भलिबल हुने छन् ।