वरिष्ठ उपाध्यक्षको व्यवस्था, उपमहासचिव एक जनामात्र रहने, सचिवको संख्या दुई थपियो

काठमाडौँ– प्रमुख प्रतिपक्षी नेकपा एमालेको गोदावरीस्थित सनराइज सम्मेलन केन्द्रमा तीन दिनसम्म चलेको प्रथम विधान महाधिवेशन सम्पन्न भएको छ । विधान महाधिवेशनले एमालेको केन्द्रीय पदाधिकारीमा अध्यक्षपछि पाँच जना उपाध्यक्ष रहने व्यवस्था संशोधन गरी पाँचमध्ये एक वरिष्ठ उपाध्यक्ष र बाँकी चारजना उपाध्यक्ष रहने भएका छन् । 

त्यस्तै, केन्द्रीय पदाधिकारीमा उपमहासचिव दुई जना रहने व्यवस्था रहेकोमा त्यसलाई घटाएर एउटामात्र बनाइएको छ । यद्यपि सचिवको संख्या भने पाँचबाट दुई जना थपेर सातजना पु¥याइएको छ । यसअघि पाँच जना सचिव रहने व्यवस्था थियो । 

विधान महाधिवेशनले एमालेमा एउटै व्यक्तिलाई एउटै पदमा दुई कार्यकालभन्दा बढीपटक उम्मेदवार हुन नपाउने व्यवस्था गरिने भएको छ । त्यस्तै ७० वर्षसम्म कुनै पनि पदमा उम्मेवार बन्न पाइने तर कार्यकालको बीचमै ७० पूरा भएपनि कार्यकाल पूरा गर्न पाइने भएको छ । 

एमालेको विधान महाधिवेशनले दिएको म्याण्डेट अनुसार विधानमा व्यवस्था गरी निर्वाचन आयोगमा बुझाइने भएको छ । त्यस्तै, विधान महाधिवेशनमा प्रवासबाट पाँच प्रतिशत सहभागिता सुनिश्चित गरेको छ । आगामी मंसीरमा हुने नेकपा एमालेको राष्ट्रिय महाधिवेशनलाई लक्षित गर्दै डा. विजय सुब्बाको अध्यक्षतामा १५ सदस्यीय निर्वाचन आयोग गठन भएको एमाले प्रचार विभागका उपप्रमुख सूर्य थापाले बताए । निर्वाचन आयोगमा महेश नेपाल, सानुराज पोखरेल, बाबुराम दाहाल, कुन्साङ लामा, रिता सिम्खडा, रञ्जु ठाकुर, भरत पोखरेल, टंक उप्रेती, सुमित्रा बिसी, पवित्रा निरौला, केवालाल चौधरी, विमला विश्वकर्मा र हिमकला गैरे सदस्य रहेका छन् । 

विधान महाधिवेशनमा एमाले अध्यक्ष केपी शर्मा ओलीले नेकपा (एमाले) को नयाँ लोगो र नेकपा (एमाले) एप्सको उद्घाटन गरेका थिए ।

विधान महाधिवेशनले निम्न १६ बुँदे प्रस्ताव समेत पारित गरेको छ ।