ईपीएलः पहिलो खेल रद्ध, दोस्रो खेलमा विराटनगर र पोखरा भिड्दै

काठमाडौँ-एभरेष्ट प्रिमियर लिग (इपिएल)को शनिबार हुने भनिएको पहिलो खेल रद्ध भए पनि दोस्रो खेलमा भने सुरु भएकाे छ । जसमा विराटनगर वारियर्स र पोखरा राइनोज भिडिरहेका छन् । ओसिलो मैदानका कारण दिनकाे पहिलाे खेल नभएपछि भैरहवा ग्लाडियटर्स र काठमाडौँ किंग्सले अंक बाँडेका थिए । 

शनिबारको दोस्रो खेलमा पोखरा राइनोजले टस जित्दै फिल्डिङ रोजेको छ ।  पोखरा र विराटनगरका लागि यो चौँथो खेल हो । पोखराले पहिलो खेलमा भैरहवा ग्लाडियटर्ससँग अंक बाडेको थियो । दोस्रो खेलमा बिहिबार ललितपुर प्याट्रियोट्सलाई नौ विकेटले पराजित गर्‍यो भने तेस्रो खेलमा चितवन टाइगर्ससँग नौ विकेटको पजय भोगेको थियो । 

उता विराटनगर भने ईपीएलमा जितविहिन छ । उसले पहिलो खेलमा चितवनसँग दुई विकेट, दोस्रो खेलमा बुधबार भैरहवासँग सात विकेट र शुक्रबार ललितपुरसँग ३७ रनले पराजित भएको थियो । 

ईपीएलको अंक तालिकामा हाल चितवन शीर्षस्थानमा छ । उसले तीन खेलमा ६ अंक बटुलेको छ । तीन खेल नै खेलेको भैरहवा चार अंकका साथ दोस्रो स्थानमा छ । तेस्रो स्थानको ललितपुर प्याट्रियोट्सको चार खेलबाट तीन अंक छ । 

६ टिम सम्मिलित ईपीएलमा विराटनगर पुच्छारमा छ । तीन खेल खेलिसकेको विराटनगर जितविहिन छ । काठमाडौँ पाँचौँ स्थानमा छ । उसले दुई खेलबाट दुई अंक बटुलेको छ ।