ईपीएल : पहिलो जितले ललितपुरलाई राहत

काठमाडौँ- एभरेष्ट प्रिमियर लिग (ईपीएल)मा शुक्रबार ललितपुर प्याट्रियट्सले विराटनगर वारियर्सलाई ३७ रनले पराजित गरेको छ । कीर्तिपुरस्थित त्रिभुवन विश्वविद्यालयको मैदानमा जारी ईपीएलमा ललितपुरको यो पहिलो जित हो । यसअघि खेलेका तीन वटै खेलमा ललितपुरले हार बेहोरेको थियो । उता विराटनगरका लागि यो तेस्रो पराजय हो । ६ टिम सम्मिलित ईपीएलमा विराटनगर पुच्छारमा छ । 

टस हारेर ब्याटिङ गरेको ललितपुरले निर्धारित २० ओभरमा पाँच विकेटको क्षतिमा २२६ रनको योगफल तयार पारेको थियो । जुन ईपीएलमा अहिलेसम्मकै सबैभन्दा ठूलो स्कोर हो । पराजित टिम विराटनगरले २० ओभरमा आठ विकेट गुमाए। १८९ रन मात्रै बनायो । 

ललितपुरका लागि दुई विदेशी खेलाडीले अर्धशतक बनाए । ओपनर सान्दुन विराकोडीले ७३ रन जोडे भने आज्मतुल्लाह ओमारजाईले अविजित ५८ रन बनाए । श्रीलंकन ब्याट्सम्यान विराकोडीले ४३ बल सामना गर्दा तीन छक्का र १० चौका प्रहार गरे । त्यसैगरी आज्मतुल्लाहले २४ बलमा सात छक्का हिर्काए । 

ललितपुरका कुशल भुर्तेलले ३२ रन जोडे भने योगेन्द्र सिंह कार्कीको नाममा २७ रन रह्यो । त्यसैगरी नारायण जोशीले अविजित १८ रन बनाए भने जयकिशन कोल्सावाला १३ रनको योगदान गरे । 

विराटनगरका लागि करण केसीले दुई विकेट लिए भने सिकन्दर राजा, प्रतिस जीसी र दिल्सान मुनाविराले एक–एक विकेट हात पारे । 

पराजित विराटनगरका लागि दिल्सान मुनाविराले सर्वाधिक ५९ रन बनाए । त्यसअघि ओपनरद्वय चन्द्रपौल हेमराज र आशिफ शेखले क्रमशः २८ रन र ३७ रन बनाएका थिए । त्यसैगरी अर्का विदेशी खेलाडी सिकन्दर राजाले २४ रन जोडे । 

विराटनगरको मध्यक्रमका अन्य ब्याट्सम्यानले भने उल्लेख्य रन जोड्न सकेनन् । अनिल शाहले ८ रन बनाए भने कप्तान करण केसी ४ रनमा सीमित भए । त्यसैगरी सौरभ खनाल शून्यमा आउट हुँदा सुमित महर्जनले दुई रन जोडे । 

बलिङतर्फ ललितपुरका आज्मातुल्लाह ओमारजाईले चार विकेट हात पारे भने ललित राजवंशीले दुई विकेट लिए । त्यसैगरी, योगेन्द्रसिंह कार्कीको नाममा एक विकेट रह्यो ।