सुत्केरीको शव आफन्तले बुझे

कैलाली - धनगढीको नवजीवन अस्पतालमा मृत्यु भएकी सुत्केरीको शव आफन्तले बुझेका छन् । डोटीको शिखर नगरपालिका-६ की २६ वर्षीया सुत्केरी कल्पना सिंह ठकुरीको आइतबार बिहान उच्च रक्तस्राव भएपछि मृत्यु भएको थियो । 

शनिबार सुत्केरी ब्यथा लागेर अस्पताल पुगेकी कल्पनाको गर्भमा रहेको बच्चालाई भ्याकुम प्रयोग गरेर निकालिए पछि उच्च रक्तस्राव भएको अस्पतालले जनाएको थियो । यता आफन्तले दोषीलाई कारबाही तथा क्षतिपूर्तिको माग राख्दै शव नउठाउने अडान लिँदै आएका थिए। 

मंगलबार साझ अस्पताल र आफन्तबीच सहमति जुटेको छ। अस्पतालले क्षतिपूर्ति दिने, शिशुको भरणपोषण गर्ने र मृतकको नाममा प्रतिष्ठान स्थापना गर्न सहमती गरेपछि शव उठाइएको मृतक आफन्तले बताए । मृतकको आजै धनगढी ३ बडहरा स्थित आर्यघाटमा दाहसंस्कार गरिएको छ ।