चिनी उद्योगीलाई कारबाही गर्न गृहको निर्देशन

काठमाडौँ : गृह मन्त्रालयले रौतहट, नवलपरासी र सर्लाहीका प्रमुख जिल्ला अधिकारीलाई चिनी उद्योगीलाई कारबाही गर्न निर्देशन दिएको छ । मन्त्रालयको आज बसेको बैठकले उखु उद्योगीहरूलाई कानुन बमोजिम कारबाही गर्न निर्देशन दिएको हो । 

बैठकले जिल्ला प्रशासन कार्यालयलाई पक्राउ पुर्जी जारी गर्ने अधिकार समेत दिएको छ । गृह, कृषि र उद्योग मन्त्रालयको संयुक्त बैठकले यस्तो निर्णय गरेको हो ।

गृह मन्त्रालयले नवलपरासी, सर्लाही र रौतहटका जिल्ला प्रशासन अधिकारीलाई कानुन बमोजिम कारबाही गर्न आदेश दिएको चक्रबहादुर बुढाले जानकारी दिए । कार्यालयलाई उनीहरुलाई पक्राउ गरी उखु किसानको बक्यौता असुलउपर गर्ने  अधिकारसमेत दिइएको छ ।

अहिले मुलत: चार उद्योगले उखु किसानको भुक्तानी दिन बाँकी रहेको मन्त्रालयले जानकारी दिएको छ । बाँकी उद्योगहरुको पनि केही रकम बाँकी भएपनि किसानको खाता नपाएको भन्दै भुक्तानी हुन नसकेको उनीहरुको भनाइ छ । चार मध्ये सबैभन्दा धेरै श्रीराम मिलको बक्यौता छ । जो करिब ३ महिनाअघि बन्द भएको थियो । 

अन्‍नपूर्ण सुगर मिलको २६ करोड रुपैयाँ बक्यौता छ । लुम्बिनी सुगर मिलको ८ करोड ४१ लाख रुपैयाँ छ । त्यस्तै इन्दिरा सुगर मिलको चार करोड ७० लाख रुपैयाँ बक्यौता रहेको मन्त्रालयले जानकारी दिएको छ ।