प्रदेश इन्चार्जको जिम्मेवारीसहित एमालेमा सात जना उपाध्यक्ष राख्‍न सुझाव

काठमाडौँ - नेकपा एमालेका केन्द्रीय सदस्यहरूले पदाधिकारी संख्या हेरफेर गर्न नेतृत्वलाई सुझाव दिएका छन् । पार्टी केन्द्रीय कमिटीको जारी बैठकमा सदस्यहरूले यस्तो सुझाव दिएका हुन् ।

१५-१७ असोजमा ललितपुरमा हुन गइरहेको प्रथम विधान महाधिवेशनमा प्रस्तुत गरिने रनजनीतिक प्रतिवेदन, संगठनिक प्रस्ताव र विधान संशोधन प्रस्तावमाथि छलफल गर्दै सदस्यहरूले पार्टीमा रहेका ‘हाइ प्रोफाइल’ नेतालाई सम्मानजनक रूपमा राख्नुपर्ने भन्दै यस्तो प्रस्ताव गरेका हुन् ।

ललितपुर च्यासलस्थित तुलसीलाल स्मृति प्रतिष्ठानको भवनमा शनिबार जारी बैठकमा कार्यकारी पदमा दुई पटकभन्दा बढी रहन नपाइने र उपाध्यक्ष र सचिवमा सात, सात जना रहनुपर्ने सुझाव प्राप्त भएको हो ।

विधान महाधिवेशनमा पेश गरिने ती प्रतिवेदन र प्रस्तावमा छलफल गर्न शुक्रबार १० वटा समूह बनाएर शनिबार (आज)सम्म छलफल भएको हो । ‘पार्टी पदाधिकारीमा सात जना उपाध्यक्ष राखेर प्रदेश इन्चार्जकोसमेत जिम्मेवारी दिन सुझाव प्राप्त भएको छ,’ महासचिव ईश्वर पोखरेलनिकट एक नेताले बताए । 

हालको विधान संशोधन प्रस्तावमा उपाध्यक्षमा तीन जनामात्रै रहने उल्लेख छ । ७० वर्षे उमेर हद राखिए पनि केपी ओली अध्यक्षमा दोहोरिने देखिएकाले एमालेमा ओलीजत्तिकै योगदान गरेका र पोर्टफोलियोका रूपले समानजस्तै रहेका नेताहरू ईश्वर पोखरेल, सुवास नेम्वाङ, भीम रावल, अष्टलक्ष्मी शाक्य, युवराज ज्ञवाली र रामबहादुर थापाहरूलाई उपाध्यक्ष र प्रदेश इन्चार्जको जिम्मेवारी दिनलाई केन्द्रीय सदस्यहरूले पहल गरेका हुन् । ओली आगामी १० फागुनमामात्र ७० वर्ष पुग्दैछन् ।