छलफलनै नगरी विनियोजन विधेयक पारित

काठमाडौँ - प्रमुख प्रतिपक्षी नेकपा एमालेका सांसदको नाराबाजीबीच विनियोजन विधेयक पास भएको छ । प्रमुख प्रतिपक्षी दल नेकपा एमालेको अवरोधबीच सरकारले प्रतिनिधिसभाबाट विनियोजन विधेयक पारित गरेको हो । 

एमाले सांसदले बैठक सुरु हुनासाथ नाराबाजी गरेका थिए । सभामुखले संसद्‌मा बजेट छलफल चलाएका थिए। बजेट अध्यादेशलाई प्रतिस्थापन गर्ने विधेयकमाथि पारित गर्ने सम्बन्ध बैठक बसेको थियो ।  प्रमुख प्रतिपक्षी दल नेकपा एमालेको नाराबाजीबीच बजेटसम्बन्धी छलफल चलेको हो । विगतमा विनियोजन विधेयकमाथि झन्डै एक महिना लामो दफावार छलफल हुनेगरेको थियो । तर प्रमुख प्रतिपक्षी दल एमालेले संसद्‌ अवरोधन गरेपछि सभामुख सापकोटाले 'फास्ट ट्रयाक'मा बजेट छलफल चलाए । 

सभामुख अग्नीप्रसाद सापकोटाले प्रमुख प्रतिपक्षलाई पेलेर बजेट छलफल गर्ने प्रक्रिया अघि बढाएका थिए ।  सभामुखले नेपाल मजदुर किसान पार्टीका सांसद प्रेम सुवाललाई बजेटमाथि छलफल गर्न १२ मिनेटको समय दिए । 

सांसद सुवालले भने, 'विनियोजन विधेयकबारे संसद्‌मा एक महिना छलफल हुन्थ्यो । अहिले १२ मिनेटको समय दिइएको छ । यसले संसद्‌ देश र जनताप्रति जवाफदेशी नभएको स्पष्ट हुन्छ ।' सुवालले बजेटमाथि छलफलभन्दा पृथक प्रश्न उठाए । उनको प्रश्न बजेटभन्दा फरक एमसीसीमा केन्द्रित थियो ।

सभामुख सापकोटाले सबै मन्त्रालयको विनियोजनमाथि छलफलमा नाम टिपाउन आग्रह गरे । तर कुनै सांसदले नाम नटिपाएपछि उनले अर्थमन्त्री जनार्दन शर्मालाई जवाफ दिन आग्रह गरे । त्यसपछि शर्माले बजेटको विशेषता पढेर सुनाए ।

सभामुख सापकोटाले अर्थमन्त्रीको भनाइमा 'स्पष्टीकरण माग गर्न' आग्रह गरे । त्यसमा सांसद सुवालले मात्र भाग लिए । सुवालले भने, 'खर्च कटौति शिर्षकमा हरियो बन तस्करको धन कहिले रोकिन्छ' भनेर सोधेको थिएँ ।' उनले द्रुतमार्ग, वाइडबडी जस्ता विषयमा स्पष्टीकरण मागे ।

अर्थमन्त्री शर्माले पनि साधारण ढंगले सुवालको प्रश्नको जवाफ दिए । त्यसपछि सभामुख सापकोटाले विनियोजन विधेयकमाथि दफावार छलफल टुंगिएको जानकारी दिए । आर्थिक विधेयकको सन्दर्भमा पनि यही क्रम चल्यो । सांसद सुवालको प्रश्न र अर्थमन्त्री शर्माको जवाफमा बजेट छलफल सीमित रह्यो ।