बलिदानपूर्ण संघर्षबाट प्राप्त संविधानमा सबै नागरिकको समान पहुँच हुनुपर्छ : राष्ट्रपति भण्डारी

काठमाडौँ - राष्ट्रपति विद्यादेवी भण्डारीले जनताको बलिदानपूर्ण संघर्षबाट प्राप्त संविधानमा सबै नागरिकको समान पहुँच हुनुपर्ने  बताएकी छन् । विधान दिवस तथा राष्ट्रिय दिवस–२०७८ को अवसरमा शुभकामना दिँदै उनले राज्यबाट प्राप्त सेवा तथा सुविधा स्थापित गरी आमनागरिकलाई सामाजिक सुरक्षाको प्रत्याभूति प्रदान गर्नुपर्नेमा जोड दिएकी हुन् । 

‘राज्यबाट प्राप्त हुने सेवा र सुविधाहरूमा सबै नागरिकको समान पहुँच स्थापित गर्नुका साथै नागरिकलाई सामाजिक सुरक्षाको प्रत्याभूति प्रदान गर्नु पर्दछ । संविधानद्वारा प्रत्याभूत गरिएका नागरिक आकांक्षालाई कार्यरूप दिनु हाम्रो युगिन अभिभारा हो,’ भण्डारीद्वारा जारी सन्देशमा भनिएको छ,‘संविधान दिवस तथा राष्ट्रिय दिवस २०७८ को यस महत्त्वपूर्ण अवसरमा जनप्रतिनिधिमूलक संस्था, राजनीतिक दल तथा राज्यका सबै अङ्गलाई संविधानको मर्म र भावना व्यवहारमा रूपान्तरण गर्न मन, वचन र कर्मले समर्पित भई आ–आफ्नो तर्फबाट इमान्दार प्रयास जारी राख्न म सबैमा आह्‍वान गर्दछु ।’ जनताको राजनीतिक अधिकार प्राप्तिका लागि गरिने संघर्षको चरण पूरा भएको भन्दै अब मुलुकको आर्थिक समृद्धिका लागि सम्पूर्ण प्रयासहरू केन्द्रित गर्नु पर्ने उनको भनाइ छ ।