जापानले नेपालमाथि लगाएको प्रवेश प्रतिबन्ध खुल्यो

काठमाडौँ - जापानले कोभिड-१९ संक्रमण नियन्त्रण गर्न भन्दै नेपालमाथि लगाएको प्रवेश प्रतिबन्ध हटाउने भएको छ । नेपालबाट रि-इन्ट्री भिसा भएकाहरूलाई जापान प्रवेशमा लगाइएको रोक हटाउने भएको हो ।  

जापानको  पररास्ट्र मन्त्रालयद्वारा प्रकाशित सीमा नियन्त्रणसम्बन्धी सूचना अनुसार नेपालसहित अफगानिस्तान, भारत, श्रीलंका, बङलादेश र माल्दिभ्सबाट प्रवेशमा लगाएको रोक हटाउने निर्णय भएको उल्‍लेख छ । सेप्टेम्बर २० तारिखदेखि जापानको आवासीय भिसा भएका रि-इन्ट्री बाहक नेपाली नेपाल-जापान यात्रा गर्न सक्नेछन् ।

पछिल्लो समय जापान प्रवेश नखुल्दा सयौं नेपालीहरू तेस्रो मुलुक १४ दिन क्वारेन्टिन बसेर जापान आउन थालेका थिए । जापानमा कोभिड संक्रमणदर केही कम भएको र संक्रमण घटेसँगै खोप लगाउनेको संख्या बढेपछि जापानले आवासीय भिसा बाहकको प्रवेशलाई खुलाएको हो  बैशाखमा बिदामा नेपाल आएका सयौँ नेपालीहरू जापानले लगाएको प्रतिबन्धका कारण नेपालमै रोकिएका थिए ।