एमालेद्वारा लुम्बिनी प्रदेश सभा अवरोध

काठमाडौँ – प्रमुख प्रतिपक्षी नेकपा एमालेले बिहीबार प्रदेश सभामा अवरोध गरेको छ । पार्टीले कारबाही गरेका सांसद् अजय शाही र बिमला खत्री वलीलाई सभामुखले पदमुक्त गरेको सूचना ननिकालेपछि एमालेले प्रदेश सभामा अवरोध गरेको हो । 

बिहीबार बैठक सुरु भएलगतै प्रदेशसभामा एमाले सांसद्ले उठेर विरोध जनाउँदै रोष्टमतिर गएका थिए । एमाले सांसदको नाराबाजी चलिरहेका बेला बैठकमा सभामुख पूर्णबहादुर घर्तीले प्रदेशसभामा विवादित सांसदबारे जानकारी गराएका थिए । यसलगत्तै सभामुखले बैठक सकिएको र आगामी बैठक ७ असोजमा बस्ने जानकारी दिए । विपक्षी गठबन्धनको सरकारमा सहभागी भएको भन्दै एमालेले शाही र वलीलाई कारबाही गरेको थियो । उनीहरूलाई सभामुखले पदमुक्त गरेर सूचना टाँस नगरेसम्म प्रदेश सभामा अवरोध गर्ने एमालेको अडान छ ।