भेरी नदीमा कालिकोटकी महिला बेपत्ता

सुर्खेत - कालिकोटकी एक महिला भेरी नदीमा बेपत्ता भएकी छन् । सुर्खेतको वीरेन्द्रनगर वडा नम्वर ११ स्थित भेरी पुलस्थित नदीबाट बेपत्ता भएको जिल्ला प्रहरी कार्यालय सुर्खेतले जनाएको छ । कालिकोट तिलागुफा नगरपालिकाका २५ वर्षिय अमला परियार नदीमा बेपत्ता भएको जिल्ला प्रहरी कार्यालय सुर्खेतका प्रहरी निरीक्षक कनक शाहीले जानकारी दिए । 

भेरी नदीको किनारमा कपडा, मोबाइल र चेक लगायतका सामाग्रीहरु भेटिएपछि मलामीहरुले प्रहरीमा खवर गरेका थिए । मलामीहरुले खवर गरेपछि जिल्लास्थित प्रहरीको टोली भेरी नदी किनारमा पुगेको थियो । ‘भेरी नदीको किनारमा कपडा, मोबाइल र चेकलगायतका सामान भेटिएको छ । त्यही सामग्रीको आधारमा महिलाको पहिचान भएको हो’ उनले भने, ‘बेपत्ता भएकी महिलाको हामीले खोजी कार्य गरिरहेका छौ तर, भेटिएको छैन ।’