दैलेखमा शिक्षक हत्या आरोपी सार्वजनिक

वीरेन्द्रनगर - दैलेखमा शिक्षक हत्या आरोपमा प्रहरीले एक महिलालाई बुधबार सार्वजनिक गरेको छ । दैलेखको गुराँस गाउँपालिकास्थित मालिका माध्यमिक विद्यालयका शिक्षक नगेन्द्र बिसीको हत्यामा संलग्न भन्दै प्रहरीले उनलाई सार्वजनिक गरेको हो ।

छिमेकी २५ वर्षीया मुना रानाले बिसीको हत्या गरेको प्रारम्भिक अनुसन्धानबाट खुलेकाले उनलाई प्रक्राउ गरिएको दैलेख प्रहरी प्रमुख, प्रहरी नायव उपरीक्षक (डीएसपी) अनुपम श्रेष्ठले बताए ।

‘मुनाले नै शिक्षक बिसीको घाँटीमा धारिलो हतियार प्रयोग गरी हत्या गरेको स्वीकार गरेकी छिन्,’ डीएसपी श्रेष्ठले भने । मुनाको कोठाबाट धारिलो हतियारसमेत बरामद भएको उनले बताए ।

व्यक्तिगत रिसइबीका कारण आफूले शिक्षक बिसीको हत्या गरेको मुनाले बयान दिएको प्रहरीले जनाएको छ । उनी गुराँस गाउँपालिका– ८, छोटेपोखरीकी रहेको प्रहरीले जनाएको छ । ४२ वर्षीय शिक्षक बिसी उक्त विद्यालयमा अढाई दशकदेखि कार्यरत थिए ।