१२ जना सहसचिवको भाग्य फैसला असोज ५ गतेदेखि

काठमाडौँ- लोकसेवा आयोगले अप्राविधिक (प्रशासन) तर्फको १२ जना सहसचिवका लागि लिखित परीक्षा उत्तीर्ण गरेकाहरुको अन्तर्वार्ता आगामी असोज ५ गतेदेखि सुरु गर्ने भएको छ ।

पाँच वर्ष उपसचिव भई कार्यरत रहेका कर्मचारीहरुबीच आन्तरिक प्रतियोगितामार्फत नियुक्त हुन लागेका उनीहरुको अन्तर्वार्ता आगामी असोज १५ गतेभित्र पूरा गर्ने लोक सेवाको तयारी छ ।

आयोग स्रोतका अनुसार यसपालि यी सहसचिवका परीक्षार्थीहरुको लिखित परीक्षाको नतिजा २९ दिनभित्र सकिएको हो । आयोगको इतिहासमा अहिलेसम्मकै सबैभन्दा कम समयमा लिखित परीक्षाको नतिजा भएको हो । यसअघि आयोगले सबैभन्दा कम ४६ दिनभित्र लिखित परीक्षाको नतिजा निकालेको थियो । आयोगको औसत परीक्षाको नतिजा निष्काशन अवधि दुई महिना छ ।

अप्राविधिकतर्फ प्रशासन, न्याय सेवा लगायतका दरबन्दी छन् । त्यसैगरी आयोगले प्राविधिकतर्फको पनि परीक्षा प्रक्रिया सञ्चालन गर्ने भएको छ । प्राविधिकतर्फ उपसमूह धेरै भएकाले प्रशासनभन्दा दरबन्दी बढी हुने गर्छ । सिंचाइ, वन, कृषि, खानेपानी, हाइवे, हाइड्रोपावर आदि उपसमूहमध्ये हरेकजसोमा रिक्त भइरहने हुन्छ ।