कागेश्वरी मन्दिर क्षेत्रमा वृक्षारोपण

काठमाडौँ – कागेश्वरी मनोहरा नगरपालिका–१ मा रहेको कागेश्वरी महादेव मन्दिर क्षेत्रमा शनिबार वृक्षारोपण गरिएको छ । स्थानीयबासीले घरमै तयार पारेको करिब एक हजार ५ सय थान फलफूल र विभिन्न जातका बिरुवा मन्दिर जानेबाटोमा निर्माण गरिएको एक हजार सिँढीको दायाँबायाँ रोपिएको हो । 

कागेश्वरी धामको विकासका लागि चालु आर्थिक वर्षमा वाग्मती प्रदेश सरकारले २० लाख र नगरपालिकाले ६० लाख रूपैयाँ विनियोजन गरेको छ । गोकर्ण–तारेभीर, सुन्दरीजल-कागेश्वरीधाम, लोकतान्त्रिक सहिद उद्यान-मणिचुड, बज्रयोगिनी-जहरसिंहपौवालाई पर्यटकीय गन्तव्यका रूपमा विकास गर्ने लक्ष्यका साथ काम भइरहेको बागमती प्रदेश सभा सदस्य तथा भौतिक पूर्वाधारमन्त्री रामेश्वर फुयाँलले जानकारी दिए ।

कागेश्वरी महादेव मन्दिरमा प्रत्येक वर्ष भाद्र शुक्ल अष्टमीका दिन मेला लाग्ने गर्छ । यस दिन यहाँको महादेव मन्दिर पूजा आराधना गरेमा काग स्पर्शबाट मुक्ति मिल्ने धार्मिक विश्वास छ । मन्दिरलाई महादेवको धामका रूपमा स्थापित गर्न एक दशकदेखि अभियान चलाउँदै आएको स्थानीयले बताएका छन् ।