‘ऐना झ्यालको पुतली’ चेक रिपब्लिकको जलिन फिल्म फेस्टिभलमा

काठमाडौं -  बुसानमा वल्र्ड प्रिमियर भएको नेपाली फिल्म ‘ऐना झ्यालको पुतली’ चेक रिपब्लिकको फिल्म फेस्टिभलमा छानिएको छ । निर्देशक सुजित विडारीका अनुसार फिल्म फेस्टिभलमा अप्रतिस्पर्धी विधामा प्रदर्शन हुन लागेको हो । 

जलिनको यो फेस्टिभल बालबालिका तथा युवा लक्षित फिल्म फेस्टिभल हो । फेस्टिभलमा बिहीबारबाट सुरु भएर अर्को बुधबारसम्म चल्नेछ । सुजितको निर्देशन रहेको ‘ऐना झ्यालको पुतली’ले दिदीभाइको सम्बन्धको कथा प्रस्तुत गर्छ । फिल्ममा सहरमा गएर पढ्न चाहाने युवतीको सपना पूरा नभएपछि भाइले दिदीलाई सहर पठाउन गर्ने संघर्षलाई पनि फिल्ममा प्रस्तुत गरिएको छ । 

सुजित बिडारीकै लेखनसमेत रहेको फिल्मलाई आइसफल प्रडक्सन र लोकल सिनेमा मिलेर निर्माण गरेका हुन् । फिल्ममा कञ्चन चिमोरिया, दिनेश खत्री, सिरु बिष्ट आदि कलाकारको अभिनय रहेको छ । फिल्मलाई अमर महर्जनले खिचेका हुन् भने फिल्मलाई किरण श्रेष्ठले सम्पादन गरेका हुन् ।