युवा संघ कार्यालयमा प्रहरीको धरपकड

काठमाडौँ – प्रमुख प्रतिपक्षी नेकपा एमालेनिकट राष्ट्रिय युवा संघ, नेपालको कार्यलयमा पसेर प्रहरीले धरपकड गरेको छ । अमेरिकी सहयोग परियोजना मिलिनियम च्यालेन्ज कर्पोरेसन (एमसीसी) र सभामुख अग्नि सापकोटाको विरोध गर्दै बुधबार प्रदर्शनमा उत्रिएका युवा संघका नेता, कार्यकर्तालाई प्रहरीले कार्यालयमै पसेर धरपकड गरेको हो । 

एमसीसी मुलुकको हितमा नभएको र  एमाले फुटाउन सभामुख मतियार बनेको भन्दै त्यसको विरोधमा युवा संघले बुधबार दिउँसो माइती घर मण्डला र नयाँ वानेश्वरमा विरोध प्रदर्शन गरेको थियो । विरोधका क्रममा प्रहरीले युवा संघका कार्यकर्तमाथि कुटपिट गरेको र वानेश्वर कृष्णटावरस्थित कार्यालयमा पसेर कुटपिट गरेको संघका सचिव जय गुरुङले इकागजसँग भने । गुरुङका अनुसार प्रहरीले कार्यालयमै पसेर कुटपिट गर्दा युवा संघका उपमहासचिव रामजी सापकोटा, सचिव गणेश थापा, स्थायी कमिटी सदस्यहरू सम्राट गौचन, वकिल वम, सचिवालय सदस्य समुन्द्र तिमल्सेना, अच्युतम सापकोटालगायत घाइते भएका छन् ।