गृह मन्त्रालयको विज्ञप्ति च्यात्ने सत्तारुढ नेकपा एसका विद्यार्थी नेताको चेतावनी

फाइल फोटो

काठमाडौँ – प्रधानमन्त्री शेरबहादुर देउवा नेतृत्वको सरकारले अभिव्यक्ति स्वतन्त्रतामा अंकुश लगाएको भन्दै नेकपा (एकीकृत समाजवादी)निकट विद्यार्थी संगठनले आपत्ति जनाएको छ । छिमेकी मित्रराष्ट्रका प्रधानमन्त्रीको प्रतिष्ठामा आँच आउने गरी नाराबाजी नगर्न गृह मन्त्रालयले आइतबार चेतावनीयुक्त विज्ञप्ति जारी गरेपछि नेकपा एसनिकट विद्यार्थी संगठन अखिल नेपाल राष्ट्रिय स्वतन्त्र विद्यार्थी यूनियन (अनेरास्ववियू)ले आपत्ति जनाएको हो । 

शुक्रबार अमेरिकी सहयोग परियोजना, मिलिनियम च्यालेन्ज कर्पोरेसन (एमसीसी)विरुद्ध अभिव्यक्ति दिनेलाई कारबाही गर्ने चेतावनीसहितको विज्ञप्ति निकालेको गृहले आइतबार पुनः चेतावनीयुक्त विज्ञप्ति जारी गरेपछि सरकारको चौतर्फी आलोचना भएको छ । अनेरास्ववियूले देउवा नेतृत्वको सरकारले नागरिकको अभिव्यक्ति स्वतन्त्रतामा अंकुश लगाउन खोजेको दाबी गर्दै यस्तो विज्ञप्ति सडकबाटै च्यातेर देखाइदिने चेतावनी दिएको हो ।

नेपालमा भारतीय हस्तक्षेप बढेको भन्दै १८ भदौमा नेकपा एमालेको विद्यार्थी संगठन अनेरास्ववियूले रत्न राज्यलक्ष्मी क्याम्पसअगाडि प्रदर्शनी मार्गमा विरोध प्रदर्शन गरेको थियो । सोही क्रममा विद्यार्थीले भारतीय प्रधानमन्त्री नरेन्द्र मोदीको पुत्ला जलाएपछि गृहले शुक्रबार विज्ञप्ति जारी गरेको थियो ।