नर्भिकमा उपचारारत मोडल निशा घिमिरेको निधन

काठमाडौँ : मोडल निशा घिमिरेको निधन भएको छ । नर्भिक अस्पतालमा उपचारारत घिमिरेको बुधबार बेलूकी ६ बजेर ५० मिनेटमा निधन भएको अस्पतालले जनाएको छ । भारतमा अभिनय सिक्ने क्रममा दुर्घटनामा परेकी घिमिरेको गम्भीर अवस्थामा नर्भिकमा उपचार भइरहेको थियो ।

अक्सिजनको सहयोगमा सीसीयूमा उपचार भएपनि अवस्था सुधार नभएसँगै बुधबार बेलूकी उनको निधन भएको अस्पतालले जानकारी दिएको छ । भारतमा दुर्घटनापछि गम्भीर अवस्थामा घरमै रहेकी उनलाई नर्भिक अस्पतालले गएको जेठ २७ गतेदेखि निःशुल्क उपचार थालेको थियो ।

नर्भिकले उपचार थालेपछि केही सुधार भएपनि उनको स्वास्थ्य पूर्ण रुपमा स्वस्थ्य हुन सकेको थिएन । पछिल्लो केही दिनयता उनको स्वास्थ्य झन् गम्भीर बन्न थालेको अस्पतालले जनाएको थियो ।