सप्तकोसीको बहावबारे गृहमन्‍त्रीको चासो

फाइल तस्‍बिर

काठमाडौँ - गृहमन्त्री बालकृष्ण खाणले निरन्तरको वर्षात्‍ले सप्तकोसीको बहाव बढेर खतराको बिन्दुमा पुगेको जानकारी आएपछि उदयपुर र सप्तरीका सुरक्षा अधिकारीहरूसँग त्यहाँको अवस्थाबारे जानकारी लिएका छन् । मन्त्री खाणले आइतबार साँझ उदयपुरका प्रमुख जिल्ला अधिकारी तुल्सीराम सेडाई, नेपाल प्रहरीका उपरीक्षक र सशस्त्र प्रहरीका उपरीक्षक तथा सप्तरीका प्रमुख जिल्ला अधिकारी जयनारायण आचार्यसँग टेलिफोन सम्वाद गरेर कोसी नदीको कटान र बहावबारे जानकारी लिएका हुन् ।

गृहमन्त्री खाणले सशस्त्र प्रहरीका प्रदेश १ का प्रमुख डिआइजीपी बम्शी दाहालसँग त्यहाँको अवस्थाबारे जानकारी लिए । मन्त्री खाणले डिआइजीपी दाहालसँग कोसीको बहावबारे भिडियो क्लिप र तस्बिरसमेत मगाएर हेरेका थिए । 

भिडियोको क्लिप हेरेपछि मन्त्री खाणले अहिलेसम्म प्राकृत्तिक प्रकोप बाढी, पहिरो र डुवानबाट बचाउन गरेको कामको सराहना गर्दै आगामी दिनमा पनि यस्ता कामलाई अझ प्रभावकारी बनाउन निर्देशन दिए। उनले कोसीको बहाव बढिरहेकाले पूर्वतयारी गर्न पनि निर्देशन दिए । नागरिकलाई सुरक्षित स्थानमा अस्थायी बासस्थान बनाएर भए पनि लैजान उनको निर्देशन थियो । 
 
डिआइजीपी दाहालले गृहमन्त्री खाणले कोसीको बहावबारे टेलिफोनमा जानकारी लिएको बताए । ‘मन्त्रीज्यूले कोसीको बहावबारे जानकारी लिनुभएको थियो । अहिले कोसीको बहाव बढेको र उदयपुर र सप्तरीका केही स्थानमा कोसीले बहाव परिवर्तन गर्न समस्या उत्पन्न हुन सक्ने अवस्था रहेको जानकारी हामीले गरायौं,’ डिआइजीपी दाहालले भने ।

डिआइजीपी दाहालका अनुसार कोसीले उदयपुरको बेलका नगरपालिकाको वडा नं आठको तपेश्वरी इलाकामा बहाव परिवर्तन गरेको छ । यहाँ नदीले कोसी छेक्न बनाएको ड्याम पनि कटान गरेको छ । ड्याम फुटिहालेमा प्रभावित हुन सक्ने बासिन्दालाई एलट गर्न काम पनि सशस्त्र प्रहरीले गरेको डिआइजीपी दाहालले बताए। ड्याम फुट्यो भने उदयपुरको बेलकाका चार गाउँ र सप्तरीको सप्तकोशी नगरपालिकामा असर पुर्याउने उनले जानकारी दिए । उनका अनुसार अहिले कोसीको बहाव दुई लाख ७२ हजार क्यूसेक प्रति सेकेण्ड छ ।