बाढीमा डुबेर नवलपरासीमा दुई जनाको मृत्यु

फाइल फोटो

बुटवल - बाढीले बगाउँदा पश्चिम नवलपरासीमा दुई जनाको मृत्यु भएको छ । एक जना बेपत्ता छन् । मृत्यु हुनेमा रामग्राम नगरपालिका–१८, बन्जरीयाका ३७ वर्षीय विनोद प्यासी र उनका छोरा १३ वर्षका प्रदीप छन् ।

सुनवल नगरपालिका १४ की एलिसा तामाङ बेपत्ता भएकी छन् । जिल्ला प्रहरी कार्यालय प्रहरी नायव उपरीक्षक राजु लामाले घरमा बाढी पसेपछि ज्यान बचाउन निस्किँदा खेतमा डुबेर उनीहरूको मृत्यु भएको जानकारी दिए ।

उनीहरूको शव केही तल खेतमा फेला परेको थियो । तामाङको अवस्था भने अहिलेसम्म अज्ञात रहेको इलाका प्रहरी कार्यालय सुनवलका प्रहरी निरीक्षक कृष्ण धितालले जानकारी दिए । उनलाई पनि बाढीले बगाएको अनुमान प्रहरीको छ । रातिदेखिको वर्षाले पश्चिम नवलपरासीको परासी बजार डुबेको छ । परासी सबै बजार जलमग्न भएको छ । 

धेरै घरहरू आधाभन्दा बढी डुबेका कारण मानिस घरको छतमा बसेका छन् । परासी हुँदै बगेको झरही नदीमा पानीको वहाब बढ्दा र रावण खन्डा खोलाको बाढी बजारमा पस्दा डुबान भएको हो ।