पत्रकार भन्दै ठग्‍ने पक्राउ

सुर्खेत - पत्रकार भनेर ठगी गरेको आरोपमा सुर्खेत प्रहरीले दुई जनालाई  पक्राउ गरेको छ । प्रहरीले ‘सुर्खेत न्युज–२४’ को पत्रकार भनेर परिचय दिने दुई जनालाई पक्राउ गरेको हो ।

पक्राउ पर्नेमा धर्मेन्द्र शाही र राजेन्द्र विक रहेको जिल्ला प्रहरी कार्यालय सुर्खेतका प्रहरी नायब उपरीक्षक रामप्रसाद घर्तीले जानकारी दिए । उनीहरु विरुद्ध प्रहरीमा लाखौ रुपियाँ ठगी गरेको उजुरी परेको थियो । उनीहरूले आफ्नो कम्पनीमा सेयर खुलेको भनेर ठगी गरेको प्रहरीले जनाएको छ ।

‘सुर्खेत न्युज–२४’ को पत्रकार भनेर उनीहरूले परिचय दिएका छन्,’ घर्तीले भने, ‘कम्पनीमा शेयर खुलेको भन्दै दुई लाख रुपियाँ ठगी गरेको उजुरी परेको छ ।’ पक्राउ परेका दुवै जनामाथि ठगी मुद्दा चलाइएको छ । ठगी मुद्दामा पाँच दिनको म्याद थपेर अनुसन्धान भइरहेको घर्तीले जानकारी दिए ।