कोभिडले बुटवलमा कर्मचारीको मृत्यु

बुटवल : कोभिड-१९ को संक्रमणबाट बुटवल उपमहानगर पालिकाका एक जना कर्मचारीको मृत्यु भएको छ । बुटवलस्थित कोरोना बिशेष अस्पतालमा शनिबार साँझ उपमहानगरका कर्मचारीको मृत्यु भएको हो । बुटवल कोरोना बिशेष अस्थायी अस्पतालमा शनिबार नै भर्ना भएका बुटवल उपमहानगरपालिका ८ को वडा कार्यालयमा कार्यरत ४९ वर्षका पुरुषको साझ ६ बजे मृत्यु भएको उपमहानगरका प्रमुख प्रशासकिय अधिकृत चक्रपाणी शर्माले जानकारी दिए ।

असोज २७ गते कोरोना पोजेटिभ भएपछि उनी होम आइसोलेसनमा बसेका थिए । स्वास्थ्यमा अलिबढी समस्या देखिएपछि उनि शनिबार बिहान लुम्बिनी प्रादेशिक अस्पताल पुगेका थिए । उनलाई तत्काल आइसियुमा राखेर उपचार गर्नुपर्ने चिकित्सकले बताए । तर अस्पतालमा बेड नभएपछि प्रादेशिक अस्पतालको फिबर क्लिनिकमा दिनभरी राखिएको थियो । बेड खाली भएपछि कोरोना विशेष अस्पतालको बेडमा रिफर गरेको केहि समयपछि उनको मृत्यु भएको अस्पतालले जानरकारी दिएको छ ।

उनको उपचारमा सबै प्रक्रिया अपनाउँदा पनि बचाउन नसकिएको लुम्बिनी प्रादेशिक अस्पतालका प्रवक्ता डा. विष्णु गौतमले बताए । बुटवलस्थित कोभिड विशेष अस्पतालको सबै बेड भरिएका छन् । गम्भीर प्रकृतिका कोरोना संक्रमित आए उपचार गर्ने स्थान नभएको अस्पतालले जनाएको छ ।