लुम्बिनीमा सभामुखसँग चिढियो एमाले !

बुटवल – प्रमुख प्रतिपक्षी नेकपा एमालेले लुम्बिनीका सभामुखको कार्यशैलीमाथि प्रश्न उठाएको छ । पार्टीले कारबाही गरेका सांसद बिमला खत्री वली र अजय शाहीलाई सभामुखले सांसद पदबाट पदमुक्त नगरेको भन्दै एमालेले आपत्ति जनाएको हो ।

मुख्यमन्त्री कुलबहादुर केसी नेतृत्वको सरकारलाई सघाएको भन्दै एमालेले कारबाही गरेका सांसदलाई प्रदेशसभा सचिवालयले पदमुक्त नगरेपछि प्रमुख प्रतिपक्षी दल र सभामुखबीच दूरी बढेको हो । पार्टीको ह्वीपविपरीत एमालेका शंकर पोखरेल नेतृत्वको सरकार ढाल्न भूमिका खेलेको र २८ साउनमा मुख्यमन्त्री बनेका केसी नेतृत्वको सरकारलाई सहयोग गरेको भन्दै एमालेले शाही र वलीलाई कारबाही गर्दै प्रदेश सभा सचिवालयमा पत्रसमेत पठाएको थियो । तर ती सांसदलाई पदमुक्त गर्दै सुचना निकाल्नमा सभामुख पूर्णबहादुर घर्तीले आवश्यक भूमिका नखेलेको भन्दै एमालेले सभामुखको कार्यशैलीमाथि प्रश्न उठाएको हो । 

प्रदेशसभा सचिवालयले भने एमालेले कारबाहीका लागि सिफारिस गरेका सांसदहरू एमालेकै हुन् भन्ने भरपर्दो प्रमाण नभेटिएको तर्क गरेको छ । ०७४ को निर्वाचनमा शाही स्वतन्त्र राजनीतिक समूहबाट विजयी भएका र वली ०७६ मंसिरमा दाङ क्षेत्र नम्बर ३ (ख) मा भएको उपनिर्वाचनमा नेकपाको चुनाव चिह्नबाट विजयी भएकाले ती सांसद् एमालेले आफ्नो दलका हुन् भन्नु तर्कसंगत नभएको प्रदेश सभा सचिवालयको दाबी छ । 

हाल यी दुवै सांसद नेकपा एमालेबाहेकका दलहरूको गठबन्धनमा लागेर केसी नेतृत्वको सरकारको पक्षमा छन् । वली हालसम्म केसी नेतृत्वको सरकारमा सहभागी नभए पनि शाही विनाविभागीय मन्त्री नियुक्त भइसकेका छन् ।

एमालेले भने शाही सूर्य चुनाव चिह्नबाट निर्वाचनमा विजयी भएको र वली पहिल्यैदेखि एमालेमै रहेको तर्क गर्दै आएको छ । ४ भदौमा प्रदेशसभाका सचिव दुर्लभकुमार पुनले एमालेलाई पठाएको पत्रमा प्रदेशसभा सदस्य शाहीले पेश गरेको व्यक्तिगत विवरण र कागजात हेर्दा उनी एमाले सांसद नरहेको पुष्टि भएको बताएका छन् । शाही र वलीलाई प्रदेश सभा सचिवालयले पदमुक्त गरेको सुचना ननिकाल्दासम्म एमालेले प्रदेश सभा अधिवेशन चल्न नदिने चेतावनी दिँदै आएको छ । एमालेकै अवरोधका कारण पाँच दिनदेखि लुम्बिनीको प्रदेश सभा चल्न सकेको छैन ।