सहकारीको सेवा शुल्कमा 'क्याप', १ प्रतिशतभन्दा बढी शुल्क लिन नपाउने

काठमाडौं : सहकारी संस्थाहरूले ऋणको ब्याजबाहेक १ प्रतिशतभन्दा बढी सेवा शुल्क लिन नपाउने भएका छन् । सहकारी संस्थाहरुले सदस्यलाई प्रवाह गर्ने कर्जामा नियमानुसार सम्झौता बमोजिमको ब्याज रकम बाहेक अतिरिक्त शुल्क लिन नपाउने सहकारी विभागले जानकारी दिएको छ ।

तर कर्जा प्रवाह गर्दा संस्थाको अतिरिक्त खर्च पर्ने अवस्था भई अतिरिक्त शुल्क नलिई नहुने भएमा शुल्क लिन पाउनेछ । ब्याज बाहेक त्यस्तो शुल्कमा अधिकतम १ प्रतिशतमा नबढ्ने गरी सेवा शुल्क लिन पाउने विभागले जानकारी दिएको छ ।

सहकारीले समूह सिर्जना गरी सामुहिक जमानीमा (लघुवित्त) कर्जा लगानी गरेको हकमा ब्याज बाहेक १.५ प्रतिशतभन्दा बढी सेवा शुल्क लिन नपाउने विभागले जानकारी दिएको छ ।

राष्ट्रिय सहकारी महासंघ, नेपाल बचत तथा ऋण केन्द्रीय सहकारी संघ लि., नेपाल बहुउद्देश्यीय केन्द्रीय सहकारी संघ लि., नेपाल कृषि सहकारी केन्द्रीय संघ लि. र राषि्ट्रय सहकारी बैंकका प्रतिनिधिहरु सम्मिलित बैठकको सुझावमा विभागले यस्तो निर्णय गरेको हो । यो व्यवस्था माघ १ बाट लागू हुने उल्लेख छ ।